Go Green Goethe ပရောဂျက်ကနေ စိတ်ဝင်စားစရာကောင်းတဲ့ အစီအစဉ်တွေနဲ့ ပြန်လည် နှုတ်ခွန်းဆက်သလိုက်ပါတယ်။ လူမှုအသိုင်းအ၀ိုင်းကို ရေရှည်တည်တံ့သော ဂေဟစနစ်နှင့် ရင်းနှီးကျွမ်းဝင်စေဖို့အတွက် ဒီတစ်ခါမှာတော့ စိတ်ဝင်စားစရာကောင်းတဲ့ အစီအစဉ်တစ်ခုနဲ့ မိတ်ဆက်ပေးလိုပါတယ်။ Goethe-Institut Myanmar / Go Green Goethe နှင့် မိတ်ဖက်အဖွဲ့အစည်းဖြစ်တဲ့ Myanmar Ocean Project တို့နဲ့ ပူးပေါင်းစီစဉ်ဆောက်ရွက်ထားတဲ့ မြန်မာနိုင်ငံမှ အံ့ဖွယ် ငါးလိပ်စွန်များနှင့် မြှင့်တက်လာသော စိန်ခေါ်မှုများအကြောင်း ဟောပြောပွဲနှင့် အံ့ဖွယ် ငါးလိပ်စွန်များအကြောင်း ရုပ်ပြစာအုပ်မိတ်ဆက်ပွဲကို လာမည့် ဇွန်လ ၂၂ ရက်နေ့၊ Goethe-Institut Myanmar ပြပွဲခန်းမတွင် ကျင်းပပြုလုပ်မှာဖြစ်ပါတယ်။

ဒီဟောပြောပွဲမှာတော့ မြန်မာနိုင်ငံတွင် ပြုလုပ်ခဲ့သည့် ငါးလိပ်စွန်အကြောင်း သုတေသန အချက်အလက်များ၊ ငါးလိပ်စွန်မျိုးစိတ်(၅)မျိုးအတွက် သုတေသနနှင့် ထိန်းသိမ်းစောင့်ရှောက်မှုများ လိုအပ်နေကြောင်းနှင့် ငါးလိပ်စွန်များ၏ မြင့်တက်လာသော အန္တရာယ်များ၊ ရှားပါးလာခြင်းနှင့် မြန်မာနိုင်ငံ၏ အခန်းကဏ္ဍကို အဓိက ပြောကြားသွားမည်ဖြစ်ပါတယ်။

အခြားသော စိတ်ဝင်စားဖွယ် အစီအစဉ်များလဲ ပါဝင်မှာဖြစ်တာကြောင့် လာရောက်ပါ၀င်ဖို့နဲ့ ပွဲအစီအစဉ်အသေးစိတ်ကို Goethe-Institut Myanmar ရဲ့ ဆိုရှယ်မီဒီယာများတွင် စောင့်ကြည့်သွားဖို့ နှိုးဆော်လိုက်ပါတယ်။

Franz Kafka ၏ ကွယ်လွန်သွားပြီး နှစ်တစ်ရာပြည့် အထိမ်းအမှတ် ကို လေးစားဂုဏ်ပြုသည့် တစ်ပတ်ကြာ ယဉ်ကျေးမှု အစီအစဉ်တစ်ခုဖြစ်တဲ့ "Recalling Kafka" ကို ၀မ်းမြောက်စွာကြေညာအပ်ပါသည်။ Goethe-Institut Myanmar မှ ရန်ကုန်ရှိ ဂျာမနီသံရုံး၏ ပံ့ပိုးကူညီမှုဖြင့် ချက်သမ္မတနိုင်ငံသံရုံးနှင့် ပူးပေါင်းကာ ကျင်းပခြင်းဖြစ်ပါသည်။ စာပေလောက၏ ထူးခြားဆန်းကြယ်ပြီး သြဇာအရှိဆုံး ပုဂ္ဂိုလ်များထဲမှ တယောက်ဖြစ်သော Franz Kafka ကိုဂုဏ်ပြုသော ထူးခြားကောင်းမွန်လှသည့် ပြပွဲများစွာတွင် လာရောက်ပါဝင်နိုင်ရန် ကျွန်ုပ်တို့မှ ဖိတ်ကြားအပ်ပါသည်။

အစီအစဉ်များမှာ။   ။

ဇွန်လ ၂၈ ရက်မှ ဇူလိုင်လ ၆ ရက်နေ့အထိ(နံနက် ၁၀:၀၀ မှ ‌ညနေ ၅:၀၀ အထိ)
Nicolas Mahler သရုပ်ဖော် ရေးဆွဲထားသည့် "Komplett Kafka" ပိုစတာပြပွဲ။(Goethe-Institut ၏ ပွဲခန်းမ)

ဇွန်လ ၂၈ ရက်မှ ဇူလိုင်လ ၆ ရက်နေ့အထိ(နံနက် ၉:၃၀ မှ ညနေ ၅:၀၀ အထိ)
ချက်သမ္မတနိုင်ငံသံရုံးမှ တင်ဆက်သော "Franz Kafka: A Man of His and Our Time" ပြပွဲ။(Goethe-Institut ၏ စာကြည့်တိုက်)

ဇွန်လ ၂၉ ရက်(အစီအစဥ် ဖွင့်ချိန် နေ့လည် ၂:၀၀၊အစီအစဥ် စတင်ချိန် နေ့လည် ၂:၃၀)
"Komplett Kafka" သရုပ်ဖော် ရေးဆွဲထားသည့် အနုပညာရှင် Nicolas Mahler မှပြပွဲအကြောင်း အွန်လိုင်းမှ တဆင့် တိုက်ရိုက် မိတ်ဆက်ရှင်းလင်းဟောပြောပွဲနှင့် တင်ဆက်မှု။(Goethe-Institut ၏ ပွဲခန်းမ)

ဇူလိုင်လ ၃ ရက်နေ့(‌နေ့လည် ၁:၃၀ မှ ညနေ ၃:၃၀ အထိ)                        
"Labyrinths in His Eyes" ဟုအမည်ရသော မောင်ဒေးနှင့် ပြည်တွင်းစာပေပညာရှင်များ၏ Franz Kafka ကို ပြန်လည်အောက်မေ့သတိရခြင်း ကဗျာရွတ်ဖတ်ပွဲ။(Goethe-Institut ၏ စာကြည့်တိုက်)

ဇူလိုင်လ ၆ ရက်နေ့ (ညနေ ၄:၃၀ မှ ညနေ ၆:၃၀ အထိ)                   
"The Metamorphosis in Myanmar" ဟုအမည်ရသော ထိန်လင်း၊ ဖြူမွန်နှင့် ထူးချွန်သော အနုပညာရှင်များ ပူးပေါင်း၍  တီထွင်ဖျော်ဖြေတင်ဆက်မှုများ။(Goethe-Institut ၏ ပွဲခန်းမ)

နောက်ထပ်အသေးစိတ်အချက်အလက်များကို ကျွန်ုပ်တို့၏ ဆိုရှယ်မီဒီယာချန်နယ်များမှ တဆင့် စောင့်မျှော်ကြည့်ရှုသွားဖို့ နှိုးဆော်လိုက်ပါသည်။

Franz Kafka ၏  ကွယ်လွန်သွားပြီး နှစ်တစ်ရာပြည့် နှစ်ပတ်လည်အတွက် စီစဥ်ထား‌သော ထူးခြားကောင်းမွန်လှသည့် ပြပွဲတစ်ခုကို ကျွန်ုပ်တို့ ကြေညာလိုပါသည်။ Literaturhaus Stuttgart နှင့် ဂျာမနီသံရုံး၏ ပံ့ပိုးကူညီမှုဖြင့် "Komplett Kafka" ပိုစတာပြပွဲကို ကျင်းပမှာ ဖြစ်ပါသည်။

Nicolas Mahler ၏ ရုပ်ပြအတ္ထုပ္ပတ္တိကို သရုပ်ဖော်ထားသော ဤပြပွဲသည် Mahler ၏ ထူးခြားသော အနုပညာစတိုင်ကို Literaturhaus Stuttgart ၏ ဆန်းသစ်သော အယူအဆနှင့် ပေါင်းစပ်ထားသည်။ သူ၏ လေးနက်သော စာပေများကြောင့် ကျော်ကြားသော Franz Kafka သည် စိတ်အားထက်သန်သော အနုပညာရှင်တစ်ဦးလည်း ဖြစ်သည်။ သူရေးခြစ်သော ရုပ်ပုံများသည် တီထွင်ဖန်တီးနိုင်စွမ်းကို ထင်ဟပ်စေသည်။

ပေါ့ပေါ့ပါးပါးနှင့် ပြောင်မြောက်သော စတိုင်ကြောင့် လူသိများသော Nicolas Mahler သည် သူ၏ ရုပ်ပြအတ္ထုပ္ပတ္တိတွင် Kafka ၏ အနှစ်သာရကို ဖမ်းစားထားသည်။ လာရောက်ကြည့်ရှုသူများအနေဖြင့်  ပုံစံသစ်တစ်ခုတွင် Kafka ၏ ဘဝခရီးဖြတ်သန်းမှုနှင့် စာပေအောင်မြင်မှုများကို ခံစားရမည်ဖြစ်ပါသည်။

ဇွန်လ ၂၉ရက်နေ့တွင် အနုပညာရှင် Nicolas Mahler ကိုယ်တိုင် ပြပွဲအကြောင်း အွန်လိုင်းမှ တဆင့် တိုက်ရိုက် တင်ဆက်ပူးပေါင်းပါဝင်ကာ ပြပွဲနှင့် ခေတ်ပြိုင်အနုပညာအပေါ် Kafka ၏ လွှမ်းမိုးမှုကို ဆွေးနွေးသွားမည်ဖြစ်ပါသည်။

ပြပွဲရက်စွဲ။                                           ။ ဇွန်လ ၂၈ ရက်မှ ဇူလိုင်လ ၆ ရက်နေ့အထိ။(နံနက် ၁၀:၀၀ မှ ညနေ ၅:၀၀ ‌အထိ)
Nicolas Mahler မှ ပြပွဲဖွင့်လှစ်ခြင်း။      ။ ဇွန်လ ၂၉ ရက်။(အစီအစဥ် ဖွင့်ချိန် နေ့လည် ၂:၀၀၊အစီအစဥ် စတင်ချိန် နေ့လည် ၂:၃၀)   
တည်နေရာ။                                         ။ Goethe-Institut Myanmar ၏ ပြပွဲခန်းမ။
ဝင်ကြေး။                                            ။အခမဲ့။
နောက်ထပ်အသေးစိတ်အချက်အလက်များကို ကျွန်ုပ်တို့၏ ဆိုရှယ်မီဒီယာချန်နယ်များမှ တဆင့် စောင့်မျှော်ကြည့်ရှုသွားဖို့ နှိုးဆော်လိုက်ပါသည်။

Goethe-Institut မြန်မာ သည် ဇွန်လတွင်ကျရောက်သည့် Pride Month ကို ဂုဏ်ပြုကြိုဆိုလိုက်ပါတယ်။ ခွဲခြားမှုမရှိသော ညီမျှပြီး တရားမျှတသော လူ့အဖွဲ့အစည်းကို ရည်မှန်းပြီး မိတ်ဖက်အဖွဲ့အစည်းများနှင့် LGBTQIA+ အသိုက်အ၀န်း အတူ လက်တွဲပူးပေါင်းလုပ်ဆောင်နေပါတယ်။ ဒီနှစ်မှာလည်း Goethe-Institut Myanmar မိတ်ဖက်အဖွဲ့အစည်းတစ်ခုဖြစ်တဲ့ Yangon Film School နှင့်အတူ LGBTQIA+ အသိုင်းအ၀န်းရဲ့ ပုံရိပ်တွေကို ကိုယ်စားပြုတဲ့ ရုပ်ရှင်ပြပွဲနှင့် အခြားစိတ်၀င်စားစရာအစီအစဉ်များ ကို  ကျင်းပပြုလုပ်သွားမည်ဖြစ်ပါတယ်။ ပွဲရက်မှာ ဇွန်လ ၁၄ ရက် သောကြာနေ့ ညနေ ၄ နာရီခွဲကနေ ၆နာရီခွဲထိ Goethe-Institut Myanmar ပွဲခန်းမမှာ ပြုလုပ်သွားမှာဖြစ်တာကြောင့် လာရောက်ပါ၀င် ကြည့်ရှုဖို့ ဖိတ်ခေါ်လိုက်ပါတယ်။

Academy of Care train-the-trainer Cohort 2 ကို မေလ ၁၃ ရက်နေ့က Goethe-Institut Myanmar တွင် စတင်ခဲ့ပါသည်။ Goethe-Institut Myanmar မှ ဦးဆောင်ပြီး နယ်သာလန်သံရုံးမှ ရန်ပုံငွေပံ့ပိုးထားသော ဤစွမ်းရည်မြှင့်တင်ရေးအစီအစဉ်ကို LaSalle College of the Arts နှင့် University of the Singapore တို့ ပူးပေါင်းဆောင်ရွက်ခြင်းဖြင့် Academy of Care ရဲ့ အနုပညာကုထုံးအစိတ်အပိုင်း၏
ပရိုဂရမ်ဖွဲ့စည်းပုံကို ပိုမိုကောင်းမွန်လာစေပြီး သင်တန်းသားများရဲ့ ပရော်ဖက်ရှင်နယ်ဖွံ့ဖြိုးတိုးတက်မှုအတွက် လိုအပ်သော နည်းပညာများနှင့် အတွေးအခေါ်ကောင်းများ ရရှိစေရန် သေချာစေပါတယ်။

မေလတွင် သင်တန်းသားများအား ဒေသတွင်း ကျွမ်းကျင်သင်တန်းဆရာများက

• စိတ်ကျန်းမာရေးနှင့် စိတ်ပိုင်းဆိုင်ရာ ပံ့ပိုးမှု
• ဆက်သွယ်ရေးအခြေခံမူများ
• အကဲဖြတ်ခြင်းနှင့် စီမံခန့်ခွဲခြင်း
• စိတ်ဖိစီးမှု၊ စိုးရိမ်ပူပန်မှုနှင့် စိတ်ဓာတ်ကျခြင်း
• အခြေခံ နှစ်သိမ့်အကြံပေးခြင်းနှင့် ကျင့်ဝတ်
• အမျိုးသမီးများနှင့် စိတ်ကျန်းမာရေး
• အသိပေးစောင့်ရှောက်မှုဆိုင်ရာ အခြေခံမူ (၆) ချက်နှင့် အခြားအရာများစွာတို့ကို ထည့်သွင်းသင်ကြားပို့ချပေးလျက်ရှိပါတယ်။

ဇွန်လထဲတွင် သင်တန်းသားသူများအနေဖြင့် အနုပညာ၊ ဂီတနှင့် ဒရာမာကုထုံးများကို သင်ယူကြမှာဖြစ်ပါတယ်။ အဆိုပါအတန်းများကို Goethe-Institut Myanmar တွင် အွန်လိုင်း ပေါင်းစပ်ပုံစံ Zoom နှင့် လူကိုယ်တိုင်လေ့ကျင့်မှုမှတစ်ဆင့် ပြုလုပ်သည့် နိုင်ငံတကာမှ ကုထုံးပညာရှင်များ၊ သင်တန်းဆရာများက ဦးဆောင် သင်ကြားပေးသွားမှာဖြစ်ပါတယ်။

စုဆောင်းခြင်း အလေ့အထ နှင့် မော်ကွန်းတိုက်များ အကြောင်း စကားဝိုင်းကို တက်ရောက်ပါဝင်ခဲ့ကြသူတိုင်းကို ကျေးဇူးတင်ပါတယ်။

မရီတာခင်မှ moderate လုပ်ပေးခဲ့တဲ့ ဒီစကားဝိုင်းမှာ မဖြူအိသိန်း၊ Phillip De Burma နဲ့ Lukas တို့အားလုံးက သူတို့ရဲ့ မော်ကွန်းတင်ခြင်း၊ စုဆောင်းခြင်း အတွေ့အကြုံတွေ၊ အဖြစ်အပျက်တွေ၊ အိုင်ဒီယာတွေ၊ မတူညီတဲ့ ရှုထောင့်တွေနဲ့ ပါဝင်ဆွေးနွေးခဲ့ပြီးတော့ မြိုင်မြိုင်ဆိုင်ဆိုင်ဖြစ်ခဲ့ပါတယ်။ ဆွေးနွေးခဲ့တဲ့ အကြောင်းအရာတွေမှာ မော်ကွန်းတစ်ခု ကို ဘယ်လိုစတင်ကြမလဲ။ မော်ကွန်းတင်တယ် ဆိုတာ ဘာအတွက်လဲ။ စုဆောင်းခြင်း အလေ့အထ နှင့် မော်ကွန်းတိုက်များ ရဲ့ ကွာခြားချက်တွေ နဲ့ အမွေအနှစ်ပစ္စည်းတွေကို ထိန်းသိမ်းရာ မှာ ဘယ်လို အခက်အခဲတွေ ကြုံတွေ့နေရသလဲ ဆိုတာတွေ ပါဝင်ခဲ့ပါတယ်။ တက်ရောက်ခဲ့သူများကလည်း စိတ်ဝင်စားဖို့ကောင်းတဲ့ မေးခွန်းတွေ မေးခဲ့ကြပြီး အားလုံးပါဝင် ဆွေးနွေးဖြစ်ခဲ့ပါတယ်။

တစ်နာရီကြာ ပြုလုပ်ဖို့ စီစဥ်ခဲ့ပေမယ့် မေးခွန်းတွေ၊ ဆွေးနွေးမှုတွေက အားကောင်းနေခဲ့တာကြောင့် အချိန်ကျော်နေခဲ့ပေမယ့် ဆက်သွားဖြစ်ခဲ့ပါတယ်။ စိတ်ဝင်တစားတက်ရောက်ခဲ့တဲ့ လူပမာဏ၊ ဆွေးနွေးခဲ့တဲ့အကြောင်းအရာတွေအတွက် ကျေနပ်အားရ ခဲ့ရပါတယ်။ Goethe-Institut Myanmar ပြပွဲခန်းမ ထဲမှာ အခုလိုအမှတ်ရစေမယ့် ညနေခင်းလေးကို ဖန်တီးပေးကြသူအားလုံးကို ကျေးဇူးတင်ပါတယ်။

နောက်ထပ်လုပ်ဆောင်သွားမယ့် ပွဲတွေ၊ အချက်အလက်တွေအတွက် မြန်မာ့ဓါတ်ပုံမော်ကွန်းကို ဖေစ့်ဘွတ် နှင့် အင်စတာဂရမ်တို့မှာ follow လုပ်ထားကြဖို့ တိုက်တွန်းချင်ပါတယ်။ မြန်မာ့ဓာတ်ပုံမော်ကွန်း အကြောင်းကို အောက်ပါ လင့်ခ်များအတိုင်း ဝင်ရောက်လေ့လာနိုင်ပါတယ်။

ဝဘ်ဆိုဒ် - www.myanmarphotoarchive.org
ဓါတ်ပုံရှာနိုင်သော ဆိုဒ် - www.myanmarphotoarchive.org/archive-search/
အင်စတာဂရမ် - @myanmarphotoarchive
အီးမေလ်း - office@myanmarphotoarchive.org

ဖောင့်တွေ၊ စာတွေဟာ ကျွန်တော်တို့နေ့စဥ်နေ့တိုင်း နေရာမျိုးစုံမှာ မြင်နေရပါတယ်။ နေ့စဥ်အသုံးပြုနေတဲ့ ဒီဂျစ်တယ် ပစ္စည်းတွေကစ ဖတ်ဖြစ်နေတဲ့ ဝတ္ထုစာအုပ်အထိ နေရာမျိုးစုံမှာ ဖောင့်တစ်ခုခုကို အသုံးပြုထားတဲ့  စာတွေကို ဖတ်ရပါတယ်။ အမြင်အားဖြင့် ဆက်သွယ်တဲ့အခါ (Visual communication) မှာ ပြောပြချင်တဲ့ အကြောင်းရာတွေ အနှောက်ယှက်အနည်းဆုံးနဲ့ စာဖတ်သူဆီရောက်သွားဖို့၊ ထိရောက်ဖို့၊ စာရေးသူရဲ့ လေသံ (tone of the writer) စတာတွေကို ဖောင့်တွေက လုပ်ဆောင်ပေးပါတယ်။ 

Type ဒီဇိုင်နာတွေက Typeface၊ ဖောင့်တွေကို လှပဆွဲဆောင်မှုရှိရုံမကပဲ လွယ်လွယ်ကူကူ ဖတ်ရှုနိုင်အောင် ဒီဇိုင်းလုပ်ကြပါတယ်။ စာလုံးတွေရဲ့ အကွာအဝေး၊ အထူအပါး၊ အနိမ့်အမြင့် တွေကိုလှပအောင် ဖန်တီးရတဲ့အပြင် ဖတ်ရှုရလွယ်ကူအောင် အမြင်ပိုင်းဆိုင်ရာ ချိန်ညှိမှုများစွာလုပ်ရပါတယ်။ အင်္ဂလိပ်ဖောင့်တွေမှာ ဖောင့်ရေးနည်းစနစ် ကျယ်ကျယ်ပြန့်ပြန့် စနစ်တကျ ရှိပြီး၊ မြန်မာဖောင့်ရေးနည်းစနစ်တွေကိုလဲ တိုးတက်အောင် ဒီဇိုင်နာတွေက လုပ်ဆောင်နေပါတယ်။

Goethe-Institut Myanmar မှ ဒီဇိုင်နာတွေ တစ်လတစ်ကြိမ် ဆုံကြတဲ့ Talking Types ကိုလက်ခံကျင်းပခွင့်ရတဲ့အတွက် ဝမ်းသာဂုဏ်ယူရပါတယ်။ Talking Types ကို စိတ်ဝင်စားမေးမြန်းခဲ့ကြသူတိုင်းကို အထူးကျေးဇူးတင်ရှိပါတယ်။ small scale တွေ့ဆုံမှုဖြစ်တာကြောင့် လူတိုင်းကို ဖိတ်ခေါ်နိုင်ခြင်းမရှိခဲ့တဲ့အတွက်လည်း စိတ်မကောင်းဖြစ်ရပါတယ်။ 

မေလ Talking Types မှာတော့ တက်ရောက်သူ ဒီဇိုင်နာ ၈ ယောက်ရှိခဲ့ပြီး အင်္ဂလိပ်ဖောင့်တွေနဲ့ မြန်မာဖောင့်တွေနဲ့ လိုက်ဖက်အောင် ဒီဇိုင်းလုပ်ခြင်းနဲ့ ပက်သက်ပြီး ဆွေးနွေးဖြစ်ခဲ့ပါတယ်။ ဇွန်လ ဒုတိယအပတ် စနေမှာပြုလုပ်မယ့် Talking Types မှာတော့ Flo (Studio Grotesk Works) ရဲ့ Typeface တစ်ခုကို အခြေခံယူပြီး လိုက်ဖက်တဲ့ မြန်မာစာလုံးတွေကို လက်တွေ့ရေးဆွဲကြမှာ ဖြစ်ပါတယ်။ 

လာမည့် Talking Types ဆုံရပ် 
ရက်စွဲ    - ဇွန်လ ၈ ရက်၊ ၂၀၂၄ ခုနှစ်
နေရာ     - Goethe-Institut Myanmar

'Think Afternoon' သည် ဧပြီလ ၂၇ ရက်နေ့တွင် Goethe-Institut မြန်မာ နှင့် မြန်မာ့ဓာတ်ပုံမော်ကွန်း တို့မှ စီစဉ်ပြီး မြန်မာ့ယဉ်ကျေးမှုအသိုင်းအ၀န်း နှင့် အနန္တအနုပညာရပ်ဝန်း တို့ အတူအကွ ပူးပေါင်းစီစဉ် ခဲ့သည့် ဆွေးနွေးပွဲတစ်ခုဖြစ်ပါသည်။ ထိုဆွေးနွေးပွဲကို သက်ဆိုင်ရာ နယ်ပယ် အသီးသီးမှ ကျွမ်းကျင် ပညာရှင်များ ဖြစ်ကြသော စုဆောင်းသူများ၊ ကျူရေတာများ၊ ဖြန့်ချိသူများ၊ အနုပညာရှင်များ၊ စာရေးဆရာများနှင့် အနုပညာဒါရိုက်တာများတက်ရောက်ပါ၀င်ခဲ့ကြသည်။

မြန်မာ့မော်ကွန်းတည်ထောင်သူ Lukas Birk နှင့်တကွ မြန်မာ့မော်ကွန်းအဖွဲ့သား နှစ်ဦး တို့ တက်ရောက် ဆွေးနွေးခဲ့ကြပါသည်။ အဓိက ဆွေးနွေး အဖြေရှာခဲ့တဲ့ အကြောင်းအရာ တွေကတော့ မော်ကွန်းတိုက်ရုပ်ပုံများ စုဆောင်းခြင်း၊ မော်ကွန်းတိုက်ရုပ်ပုံများထုတ်ဝေခြင်း၊ မော်ကွန်းတိုက်ဆိုင်ရာ ပစ္စည်းများနှင့်ဆက်နွှယ်သည့် မူပိုင်ခွင့်ဆိုင်ရာများ၊တိုင်းရင်းသား လူနည်းစုများ၏ သမိုင်းရုပ်ပုံများစုဆောင်းရာတွင် လိုအပ်နေသည့် အချက်များကို ဖြေရှင်းရန် နည်းဗျူဟာများကို ထည့်သွင်းဆွေးနွေး ခဲ့ကြပါသည်။

တက်ရောက်သူများအားလုံး၏ တက်တက်ကြွကြွဆွေးနွေးချက်များ၊ အကြုံပြုချက်များနဲ့ အပြုသဘောဆောင်တဲ့ ဝေဖန်ချက်များ သည် စကားဝိုင်း ကို မြိုင်မြိုင်ဆိုင်ဆိုင် ဖြစ်စေခဲ့ပြီး အားရကျေနပ်စရာဖြစ်ခဲ့ရပါသည်။ ဒီဆွေးနွေးဝိုင်းမှာ ပါ၀င်ဆွေးနွေး အချိန်ပေးခဲ့ကြသူများ နှင့် MPA နှင့် အတူ ပူးပေါင်းစီစဉ် ပေးခဲ့ကြပါသော သူများ အားလုံးကို အထူးပင်ကျေးဇူးတင်ပါသည်။

Goethe-Institut မြန်မာတွင် ဂျာမန်စကားကိုစနစ်တကျစတင်သင်ယူပါ။ ကျွန်ုပ်တို့၏ဂျာမန်ဘာသာစကားသင်တန်းများကို ဥရောပဘာသာစကားဆိုင်ရာစံချိန်စံနှုန်းမူဘောင် (GER) နှင့်အညီ အဆင့် (၆)ဆင့်အပေါ်တွင်အခြေခံထားပါသည်။ ထို့ကြောင့် ကျွန်ုပ်တို့၏သင်တန်းများသည်  နိုင်ငံတကာစံချိန်စံနှုန်းနှင့်တိုင်းတာနှိုင်းယှဥ်နိုင်ပါသည်။ Goethe-Institut မြန်မာက ဇွန်လအတွက်  ( Online , In-person, Hybrid ) ဂျာမန်ဘာသာစကားသင်တန်းများဖွင့်လှစ်လျက်ရှိပါသည်။ စာရင်းပေးသွင်းရမည့်ကာလမှာ ၂၉.၀၅.၂၀၂၄ မှ ၀၇.၀၆.၂၀၂၄ အထိဖြစ်ပြီး စုံစမ်းမေးမြန်းလိုသည်များရှိပါက info.language.mmr@goethe.de မှတဆင့် အီးမေးလ်ပေးပို့ဆက်သွယ်နိုင်ပါသည်။

သင့်ရဲ့ဂျာမန်ဘာသာစကားအရည်အသွေးကိုသက်သေပြရန် ကမ္ဘာတဝှမ်းကအသိအမှတ်ပြုသောအောင်လက်မှတ်တစ်ခုလိုအပ်နေပါသလား။?

Goethe-Institut ၏ဘာသာစကားအောင်လက်မှတ်သည် ဂျာမန်ဘာသာစကားစွမ်းရည်ကိုမှတ်ကျောက်တင်ရန် ကမ္ဘာတဝှမ်းကအသိမှတ်ပြုသည့်အောင်လက်မှတ်ဖြစ်ပါသည်။ Goethe-Institut မြန်မာက ဇွန်လအတွက် Goethe-Zertifikat စာမေးပွဲများကိုကျင်းပမည်ဖြစ်ပါသည်။ စာရင်းသွင်းကာလမှာ ၁၂.၀၆.၂၀၂၄ မှ ၂၁.၀၆.၂၀၂၄  ဖြစ်သည့်အတွက် ယခုပဲအချိန်စာရင်းကိုကြည့်ပြီး info.language.mmr@goethe.de ကိုအီးမေးလ်ပို့ပြီး စာရင်းပေးသွင်းနိုင်ပါပြီ။

စာကြည့်တိုက်ရှိ ကလေးနှင့်လူငယ်အစီအစဉ်မှ ကြိုဆိုပါတယ်! ကျွန်ုပ်တို့ရဲ့ လာမည့် activity လေးကတော့  Traditional Paper Mache Creatures: Painting Activity ဖြစ်ပြီး၊ အသက် ၆ နှစ်မှ ၁၁ နှစ်အရွယ် သားသားမီးမီးများ ပါ၀င်နိုင်မှာ ဖြစ်ပါတယ်။
 
ဒီ activity လေးမှာဆိုရင်တော့ သားသားမီးမီးတို့ရဲ့ တီထွင်ဖန်တီးမှုတွေရယ် ပျော်ရွှင်မှုတွေရယ်နဲ့ ပေါင်းစပ်ပြီး Banner Nature Based Homeschool and Educational Training Centre မှ ဆရာမနဲ့အတူ ရိုးရာစက္ကူအရုပ်လေးတွေကို ပျော်ပျော်ပါးပါး ဆေးရောင်ခြယ်ကြမှာပဲ ဖြစ်ပါတယ်။

ဝင်ကြေးအခမဲ့ဖြစ်ပြီး၊ လူဦးရေကန့်သတ်ထားတာမို့ စာရင်းပေးသွင်းချင်တယ်ဆိုရင်တော့ အမည်၊ အသက်၊ ဖုန်းနံပါတ်နဲ့ အီးမေးလ်ကို စာကြည့်တိုက်ဖွင့်ချိန်အတွင်း ၀၁ ၉၃၇၆၁၆၀ (လိုင်းခွဲနံပါတ် ၃၀၁/၃၀၂) မှ တစ်ဆင့်ဖြစ်စေ၊ biblio-yangon@goethe.de မှတစ်ဆင့် ဖြစ်စေ စာရင်းပေးသွင်းနိုင်ပါပြီ။ ကျွန်ုပ်တို့ရဲ့ activity လေးက သားသားမီးမီးတို့ရဲ့ ဖန်တီးမှုတွေကို စောင့်မျှော်နေပါတယ်။

စာကြည့်တိုက်မှာ ပြုလုပ်မယ့် ပွဲလေးတစ်ခုအကြောင်းမိတ်ဆက်ပေးချင်ပါတယ်။ “သွင်ပြောင်းနှလုံးသားများအတွက် သွင်ပြောင်းလင်္ကာ” အလုပ်ရုံဆွေးနွေးပွဲရဲ့ ဒုတိယမြောက် အစီအစဥ်အဖြစ် စကားပြေရေးသား ဖန်တီးမှုဆိုင်ရာ ဆွေးနွေးပွဲတစ်ခုကို ဇွန်လအတွင်းမှာ ပြုလုပ်သွားဖို့ရှိပါတယ်။ စကားပြေရေးသားမှုလို့ဆိုရာမှာ မိမိရဲ့ဘဝအတွေ့အကြုံ (ငယ်ဘဝ၊ လူငယ်ဘဝ၊ လုပ်ငန်းခွင်ဘဝ၊ သားသမီးဘဝ၊ မိဘဘဝ၊ နေ့စဥ်ဘဝ အတွေ့ အကြုံများ) နဲ့ မိိမရဲ့ မှတ်ဥာဏ်အတွင်း ကိန်းအောင်းနေတဲ့ အမှတ်ရချက်များ၊ စတာတွေကို သုံးစွဲရေးသားတဲ့ စကားပြေ (Fiction/Non Fiction) မျိုးကို အဓိကထားပြီး ရေးသား လေ့ကျင့် ဆွေးနွေးကြမှာဖြစ်ပါတယ်။ နိုင်ငံတကာမှ စကားပြေ အရေးအသားများနဲ့ ပြည်တွင်းဖြစ် စကားပြေ အရေးအသားများကို ဖတ်ရှုဆွေးနွေး ကြမှာဖြစ်သလို၊ မိမိကိုယ်တိုင် ရေးသားနိုင်ဖို့ အတွက်ကိုလည်း ဆွေးနွေးမှုအဆင့်အမျိုးမျိုး၊ လေ့ကျင့်ခန်းအမျိုးမျိုး ကိုပြုလုပ်ကြမှာဖြစ်ပါတယ်။
 
“ကလေးဧည့်သည်နှင့် အခြားဝတ္ထုတိုများ”၊ “အမှောင်ထုထဲသို့ ကျောက်ခဲပစ်ခြင်း” စတဲ့ စကားပြေစာအုပ်တွေကို ရေးသားထုတ်ဝေခဲ့သူ ကဗျာဆရာ၊ စာရေးဆရာမောင်ဒေး ဦးဆောင်ဆွေးနွေးမယ့် ဒီအလုပ်ရုံဆွေးနွေးပွဲဟာ စကားပြေကောင်းများရေးသားလိုသူတွေအတွက် အလွန်သင့်လျော်တဲ့ဆွေးနွေးပွဲတစ်ခုဖြစ်တာမို့ စိတ်ဝင်စားသူများအနေနဲ့ မလွတ်တမ်း တက်ရောက်သင့်ကြောင်း အသိပေးကြော်ငြာလိုပါတယ်။

ဇွန်လမှာပြုလုပ်မယ့် ဒီအလုပ်ရုံဆွေးနွေးပွဲကို တက်ရောက်လိုသူများက ကြိုတင်စာရင်းပေးသွင်းရန် လိုအပ်ပြီး၊ စာရင်း ပေးသွင်းထားသည့်သူများထဲမှ ရွေးချယ်ခံရသောသူများက အလုပ်ရုံဆွေးနွေးပွဲကို အခမဲ့ တက်ရောက်နိုင်မှာဖြစ်ပါတယ်။ စာကြည့်တိုက်မှာ ပြုလုပ်သွားမှာဖြစ်ပြီး အစီအစဉ်အသေးစိတ်၊ တက်ရောက်ရမည့်နေ့ရက်များ၊ စာရင်းပေးသွင်းခြင်း စတဲ့အချက်အလက်တွေကို မကြာမီ အချိန်အတွင်းမှာ ကျွနိုပ်တို့ရဲ့ လူမှုကွန်ယက်စာမျက်နှာများမှာ ဖော်ပြပေးသွားမှာပဲဖြစ်ပါတယ်။

ဒီလရဲ့ "Leseclub" အစီအစဥ်လေးကတော့  A1 level အတွက် ဖြစ်ပြီး၊ ဂျာမန်ဘာသာစကား သင်ယူနေတဲ့သူတွေရော၊ သင်ယူတတ်မြောက်ပြီးတဲ့သူတွေပါ လာရောက်ပါဝင်လို့ရပါတယ်။ ဒီအစီအစဉ်လေးကနေတစ်ဆင့် စာဖတ်စွမ်းရည် တိုးတက်စေရုံသာမကပဲ၊ စကားလုံး၀ေါဟာရများ ကြွယ်၀လာပြီး၊ အတွေးအခေါ်စွမ်းရည်များကိုပါ တိုးတက်လာစေမှာ ဖြစ်ပါတယ်။  
 
စိတ်ပါ၀င်စားလို့ ပါ၀င်ချင်တယ်ဆိုရင်တော့ biblio-yangon@goethe.de သို့ အီးမေးလ်ပေးပို့ပြီး စာရင်းပေးသွင်းနိုင်ပါတယ်။

“Learning Advisory" Programလို့ ခေါ်တဲ့ "Lernberatung" အစီအစဉ်မှာ သင့်ရဲ့ ဂျာမန်စာလေ့လာမှုနဲ့ ပတ်သက်ပြီး ရင်ဆိုင်နေရတဲ့ အခက်အခဲတွေ၊ ပြဿနာတွေကို Goethe-Institut Myanmar မှ ဆရာ/ဆရာမကနေ ဆွေးနွေးအကြံပြုပေးသွားမှာ ဖြစ်ပါတယ်။ ဒီလရဲ့ ''Lernberatung'' အစီအစဉ်မှာတော့ ဂျာမန်ဘာသာစကားကို A2 level လေ့လာနေသူများအတွက် သိရှိသင့်တဲ့ လေ့လာသင့်တဲ့ စာအုပ်တွေ၊ online resource တွေ၊ မိမိ level နဲ့ ကိုက်ညီမယ့် အကြံပြုချက်တွေကို ဆွေးနွေးအကြံပြုပေးသွားမှာပဲ ဖြစ်ပါတယ်။ 

စာကြည့်တိုက်သို့ လူကိုယ်တိုင် မလာရောက်နိုင်သူတွေအတွက်လည်း ပါ၀င်မေးမြန်းလို့ရအောင် virtual online session ကိုလည်း ထည့်သွင်းစီစဉ်ပေးထားတာဖြစ်လို့ သင့်ရဲ့ ဂျာမန်စာလေ့လာသင်ယူမှုနဲ့ ပတ်သက်ပြီး အခမဲ့ မေးမြန်းလို့ရမယ့် ကျွန်ုပ်တို့ရဲ့ Learning Advisory အစီအစဉ်ကို အခုပဲ စာရင်းပေးသွင်းပြီး ပါ၀င်လိုက်ပါ: biblio-yangon@goethe.de

သောကြာနေ့မှာ ပျော်စရာနည်းလမ်းတွေနဲ့ အချိန်ဖြုန်းဖို့ စိတ်ကူးရှိပါသလား။ ဒါဆိုရင်တော့ ကျွန်ုပ်တို့ စာကြည့်တိုက်၏ လစဥ်ကျင်းပတဲ့ Board Game Friday ကိုသာ သတိရလိုက်ပါ။ ဒီတစ်ခေါက်မှာတော့ အချိန်ရေစီးကြောင်းတိုင်းမှာ အမြဲတမ်း မရိုးသွားသေးတဲ့ Monopoly ကို ဆော့ကြမှာဖြစ်ပါတယ်။

ဒါပေမယ့် ကျွန်ုပ်တို့၏ Board Game Friday က အံစာတုံးလှိမ့်ပြီး ကတ်ရွှေ့ ကစားခြင်းထက် ပိုပါတယ်။ ဂိမ်းဆော့ရင်း ပျော်ရွှင်မှုကို ရှာဖွေ နိုင်ရုံသာမက မိမိ၏ဘာသာစကားစွမ်းရည်ကိုလည်း မြှင့်တင်နိုင်သော အခွင့်အလမ်းတစ်ခုအဖြစ် ဖန်တီးထားပါတယ်။ ဂျာမန်စကားလုံး ဝေါဟာရနဲ့ အသုံးအနှုန်းများကို လေ့လာလို့ရနိုင်တဲ့ တကယ့်အတွေ့အကြုံကောင်း တစ်ခုရစေမှာဖြစ်ပါတယ်။

စိတ်ပါ၀င်စားသူများအနေဖြင့် biblio-yangon@goethe.de သို့မဟုတ် 01 9376160 (ext. 301/302) ကို စာကြည့်တိုက်ဖွင့်ချိန်အတွင်း ကြိုတင်စာရင်းပေးဆက်သွယ်နိုင်ပါတယ်။ ဒါကြောင့် သူငယ်ချင်းတွေစုပြီး စာတူတူလေ့လာရင်း ပျော်စရာ အမှတ်ရစရာ နေ့လေးကို ကျွန်ုပ်တို့ဆီမှာ Board Game ဆော့ရင်း ဖန်တီးလိုက်ပါ။

ဇူလိုင်လမှစ၍ ကျွန်ုပ်တို့ စာကြည့်တိုက်၀န်ဆောင်မှုများကို စနေ၊ တနင်္ဂနွေတွင် ပြန်လည်ဖွင့်လှစ်မည်ဖြစ်ကြောင်း အသိပေးအပ်ပါသည်။ ကျွန်ုပ်တို့ စာကြည့်တိုက်မှာ သင်ကြိုက်နှစ်သက်သော စာအုပ်များနှင့် အသစ်သစ်သော အကြောင်းအရာများ စူးစမ်းရှာဖွေရန် စာကြည့်တိုက်ဖွင့်ချိန်များဖြစ်သည့်
တနင်္လာ၊ အင်္ဂါ၊ ဗုဒ္ဓဟူး 
သောကြာ၊ စနေ၊ တနင်္ဂနွေ 
မနက် ၉း၃၀ မှ ညနေ ၅း၀၀ နာရီအတွင်း လာရောက်လေ့လာနိုင်ပါသည်။ (ကြာသပတေးနေ့နှင့် အများပြည်သူရုံးပိတ်ရက်များတွင် စာကြည့်တိုက်ပိတ်ပါသည်။)

Goethe-Institut မြန်မာ၏ စာကြည့်တိုက်ဟာ စာဖတ်ရှုရာနေရာ တစ်နေရာအဖြစ်သာ မဟုတ်ဘဲ၊ သက်တောင့်သက်သာရှိတဲ့ စာပေလေ့လာလို့ရတဲ့၊ တစ်ဦးနဲ့တစ်ဦးတွေ့ဆုံလို့ရတဲ့ နေရာအဖြစ် တည်ရှိပါတယ်။ သက်တောင့်သက်သာရှိတဲ့ အလုပ်လုပ်စရာ၊ စာဖတ်စရာ နေရာတွေကြောင့် သင့်အနေနဲ့ လှပတဲ့ ပတ်၀န်းကျင်တစ်ခုမှာ စာပေလေ့လာနိုင်၊ ဂျာမနီနိုင်ငံရဲ့ လက်ရှိ အခြေအနေ အကြောင်းကိုလည်း သတင်းအချက်အလက်ရယူနိုင်၊ ဂိမ်းတွေ (Board games) ရော၊ PlayStation ကစားရင်းနဲ့ပါ အချိန်ကို အသုံးချနိုင်ပါတယ်။

စာကြည့်တိုက်ရှိ စာအုပ်စာပေများကို အများပြည်သူ ဌားရမ်းအသုံးပြုနိုင်ရန် အသင်း၀င်ကြေးသတ်မှတ်ချက်များကိုလည်း ဖော်ပြပေးလိုက်ပါတယ်။မြန်မာနိုင်ငံသားများအတွက် အသင်း၀င်ကြေးက တစ်နှစ်လုံးစာအတွက် သုံးသောင်းကျပ် (၃၀.၀၀၀) ဖြစ်ပြီး၊ နိုင်ငံခြားသားအသင်း၀င်များအတွက်တော့ ခြောက်သောင်းကျပ် (၆၀.၀၀၀) ဖြစ်ပါတယ်။
Goethe-Institut မြန်မာမှာ ဂျာမန်ဘာသာ စကားသင်ကြားနေသူ သင်တန်းသူ၊ သင်တန်းသားများအတွက်တော့ သင်တန်းကာလအတွင်းမှာ အသင်းဝင်ကြေး အခမဲ့ ဖြစ်ပါတယ်။

စာကြည့်တိုက် အသင်းဝင်ကတ် ပြုလုပ်ဖို့အတွက် သင့်ရဲ့ မှတ်ပုံတင်၊ Passport (သို့မဟုတ်) သက်တမ်းရှိသော ကျောင်းသားကတ် တစ်ခုခုကို ယူဆောင်လာရပါမယ်။ စာကြည့်တိုက်ကို လာရောက်ပြီး ကျွန်ုပ်တို့ရဲ့ ဒစ်ဂျစ်တယ် စာကြည့်တိုက်ကတ် BibToGo ကို ရယူလိုက်ပါ။ ကျွန်ုပ်တို့စာကြည့်တိုက်အဖွဲ့သားများက သင်စာကြည့်တိုက်သို့ လာရောက်တဲ့အခါ အသေးစိတ်အချက်အလက် များကို ရှင်းပြဖို့ အဆင်သင့်ရှိနေပါတယ်။