Goethe-Institut မြန်မာ မိသားစုက တစ်နှစ်ပတ်လုံးပြုလုပ်လာခဲ့တဲ့ Go Green Goethe အစီအစဉ်ဟာဆိုရင် နှစ်ကုန်ပိုင်း အစီအစဉ်တွေဆီကို ရောက်ရှိလို့လာခဲ့ပြီး ဖြစ်ပါတယ်။

ပွင့်လင်းရာသီကို ဉီးတည်နေတဲ့ အချိန်တွေလည်း ရောက်ရှိလာပြီဖြစ်လို့ ဒီတစ်ခေါက် Go Goethe Green ရဲ့ အစီအစဉ်တွေကို ပြင်ပက စိတ်၀င်စားသူတွေနဲ့ ပူးပေါင်းပြီး စိတ်၀င်စားဖွယ်ရာ outdoor အစီအစဉ်တွေ ပြုလုပ်သွားဖို့ စီစဉ်ထားပါတယ်။

ရုံးလုပ်ငန်းတွေနဲ့ အမြဲလည်ပတ်နေတဲ့ Goethe-Institut မှာဆိုရင် ရုံးလုပ်ငန်းဆိုင်ရာ စွန့်ပစ်ပစ္စည်းတွေလည်း အမြောက်အမြား ထွက်ရှိပါတယ်။ အဲဒီလိုထွက်ရှိလာတဲ့ စွန့်ပစ်ပစ္စည်းတွေကနေ သီတင်းကျွတ်၊ တန်ဆောင်တိုင်ကာလအတွင်းမှာ မီးထွန်းအလှဆင်နိုင်မယ့် မီးပုံးလေးတွေ၊ အလှဆင်ပစ္စည်းလေးတွေ ပြုလုပ်သွားဖို့ ရှိပါတယ်။
ဒီအစီအစဉ်လေးကို Goethe-Institut မြန်မာရဲ့ မိသားစုတွေအပြင် စိတ်ပါ၀င်စားသူတွေပါ ပါ၀င်နိုင်ဖို့လည်း စီစဉ်ထားရှိထားပါတယ်။

ရုံးတွင်းက ထွက်ရှိလာတဲ့ စာရွက်တွေ၊ အခြား စုဆောင်းထားတဲ့ စွန့်ပစ်ပစ္စည်းတွေကို ပေါင်းစပ်ပြီး စက္ကူပြုလုပ်နည်း၊ စက္ကူအလှထွင်းဖြတ်တောက်နည်းတွေကနေ မီးပုံးလေးတွေ၊ အလှဆင်ပစ္စည်းလေးတွေ ဖြစ်လာတဲ့အထိ သင်ပြပေးမယ့် အလုပ်ရုံဆွေးနွေးပွဲတစ်ခုကို ပြုလုပ်မှာ ဖြစ်ပါတယ်။

အလုပ်ရုံဆွေးနွေးပွဲကနေ ထွက်ရှိလာတဲ့ လက်ရာလေးတွေကို ရွေးချယ်ပြီး သီတင်းကျွတ်၊ တန်ဆောင်တိုင်ကာလတွေမှာ Goethe-Institut မြန်မာရဲ့ ပရ၀ဏ်အတွင်းမှာ အလှဆင်ပြသသွားမှာ ဖြစ်ပါတယ်။ ဒါ့အပြင် နှစ်ကုန်ပိုင်းမှာ ပြုလုပ်မယ့် ပြပွဲအစီအစဉ်တွေ ရှိလာရင်လည်း ထည့်သွင်းပြသသွားမှာ ဖြစ်ပါတယ်။

သဘာ၀ပတ်၀န်းကျင်ကို ကာကွယ်ဖို့အတွက် တစ်နိုင်တစ်ပိုင် အလေ့အကျင့်လေးတွေ ပျိုးထောင်ရင်း Goethe-Institut မြန်မာရဲ့ သဘာ၀ပတ်၀န်းကျင်ဆိုင်ရာ လှုပ်ရှားမှုလေးတွေကို အစဉ်မပြတ် စောင့်ကြည့်သွားဖို့ ဖိတ်ခေါ်လိုက်ပါတယ်။

အလုပ်ရုံအချိန်ဇယား
အောက်တိုဘာ : (၄-၅) (၁၁-၁၂) (၁၈-၁၉)
(နံနက် ၁၀:၀၀ - ညနေ ၀၅:၀၀)
အလုပ်ရုံဦးဆောင်သူ: ဖြိုးသမိန်

Goethe-Institut မြန်မာရဲ့ မိသားစု၀င်တွေကနေ တစ်နှစ်တာလုံးဖော်ဆောင်နေကြတဲ့ Go Green Goethe စီမံကိန်းရဲ့အစိတ်အပိုင်းအဖြစ် ၂၀၂၄ ရဲ့ နှစ်ကုန်ပိုင်းလတွေမှာ ပလတ်စတစ်လျှော့ချရေးနေ့ရက်တွေကို ပြုလုပ်သွားမှာဖြစ်ပါတယ်။
စက်တင်ဘာလကစတင်ပြီး လ တစ်လ ရဲ့ နောက်ဆုံးအင်္ဂါနေ့တိုင်း ကို ’Plastic Free Day‘ အဖြစ်သတ်မှတ်ပြီး အတတ်နိုင်ဆုံးပလတ်စတစ် မသုံးစွဲသည်အထိလျှော့ချဖို့ Goethe-Institut ရဲ့ ပရ၀ဏ်အတွင်းမှာ အသိပေးမှုတွေ၊လှည့်လည်လှုံ့ဆော်မှုတွေ၊စစ်ဆေးမှုတွေကို လုပ်ဆောင်သွားမှာဖြစ်ပါတယ်။

ယခုအစီအစဉ်မှာ Goethe-Institut မြန်မာရဲ့၀န်ထမ်းများ၊ကျောင်းသူကျောင်းသားများ၊စာကြည့်တိုက်လာရောက်သူများ၊အနုပညာပြပွဲများသို့လာရောက်ကြည့်ရှုသူများနဲ့ ဧည့်သည်များအားလုံးထိထိရောက်ရောက်ပူးပေါင်းပါ၀င်နိုင်ကြဖို့ နှိုးဆော်လိုက်ရပါတယ်။

"Plastic Free Day"နေ့ရက်များ
၂၄၊၀၉၊၂၀၂၄
၂၉၊၁၀၊၂၀၂၄
၂၆၊၁၁၊၂၀၂၄
၃၁၊၁၂၊၂၀၂၄

မင်္ဂလာပါ - စင်္ကာပူ

စင်္ကာပူနိုင်ငံတကာဓာတ်ပုံပွဲတော် (SIPF) ရဲ့ ကိုးကြိမ်မြောက် ပွဲတော် ကို လာမည့် အောက်တိုဘာလ ၁၈ ရက်မှ ၂၄ ရက်အထိ ကျင်းပပြုလုပ်မှာဖြစ်ပြီး၊ မြန်မာ့ဓာတ်ပုံမော်ကွန်းမှလည်းအတူပါဝင်ပြသသွားမှာဖြစ်ပါတယ်။ စင်္ကာပူမှာရှိတဲ့ မြန်မာ့လူမှုအသိုက်အဝန်း အတွက် အရေးပါသော ဆုံချက်တစ်ခုဖြစ်တဲ့ Peninsular ရှော့ပင်းစင်တာမှာ မြန်မာ့ဓာတ်ပုံမော်ကွန်းရဲ့ ဓာတ်ပုံပြပွဲ ကို ကျင်းပ ပြသသွားမှာဖြစ်ပါတယ်။

Peninsular ရှော့ပင်းစင်တာမှာ မြန်မာစားသောက်ဆိုင် နှစ်ဆိုင်လည်း ရှိနေပါတယ်။ ရှော့ပင်းစင်တာမှာ ရှိနေကြတဲ့ စတိုးဆိုင်ပိုင်ရှင်များ နှင့် ပူးပေါင်း၍ ရှုထောင့်ပေါင်းစုံမှ တင်ဆက်ပြပေးမည့် ဓာတ်ပုံပြပွဲကို လူတိုင်း ပါဝင်ကြည်ရှုနိုင်မှာဖြစ်ပါတယ်။ ဒါ့အပြင် မန္တလေး အသားကင်ဆိုင် မှ တူရိယာပစ္စည်းရောင်းသည့် ဆိုင်အထိ ဆိုင်ပေါ်မူတည်ပြီး ထူးခြားသည့် ပုံစံများဖြင့် ပြပွဲကို စီစဥ်ထားမှာဖြစ်ပြီး ဖလင်ဓာတ်ပုံဆားဗစ် ပေးသည့် ဓာတ်ပုံစတူဒီယို တစ်ခုလဲ ပါဝင်မှာဖြစ်ပါတယ်။

ဓာတ်ပုံပွဲတော်ချိန်အတွင်း ယခင် Goethe-Institut မြန်မာမှာ ပြုလုပ်ခဲ့တဲ့ ပြန်တွေးမြင်ကြည့် (Rethink) ပြပွဲမှာ ထုတ်ဝေခဲ့တဲ့ ပြန်တွေးမြင်ကြည့် သတင်းစာကို အင်္ဂလိပ်နှင့် မြန်မာ ဘာသာနှစ်မျိုးနဲ့ အခမဲ့ဖြန့်ဝေပေးသွားမှာဖြစ်ပါတယ်။

ပြီးခဲ့တဲ့ စက်တင်ဘာ ၁ ရက်နေ့၊ နေ့လည် ၁ နာရီကနေ ၃ နာရီထိ Yangon Book Plaza မှာ ကျင်းပပြုလုပ်ခဲ့တဲ့ Hand Colouring စာအုပ် မိတ်ဆက်ပွဲနှင့် စာအုပ်ဝယ်သူများကိုယ်တိုင် ပါဝင်ဆေးခြယ်နိုင်တဲ့ အစီအစဉ်မှာ စိတ်ဝင်တစား လာရောက်ပါဝင်ပေးခဲ့ကြသူများစွာ ရှိခဲ့ပါတယ်။ Hand Colouring Book ဖြစ်ပေါ်လာပုံနဲ့ သေးငယ်ပြီး ချစ်စရာကောင်းတဲ့ အိတ်ဆောင်အရွယ်စာအုပ်အတွင်းမှာ ဖြူမည်းဓာတ်ပုံများကို အနုစိတ် ဆေးခြယ်ထားသည့် ပုံများနှင့်တကွ နည်းမျိုးစုံ၊ ပုံစံမျိုးစုံဖြင့် ချယ်သနိုင်သော နည်းလမ်းများကိုလည်း ရှင်းလင်း မိတ်ဆက်ခဲ့ပါတယ်။ ဖြူမည်းဓာတ်ပုံများပေါ်တွင် ဆေးခြယ်နည်း ပြသသင်ကြားပေးသည့် အစီအစဥ်မှာလဲ အယောက် ၂၀ ခန့်ပါဝင်ခဲ့ပါတယ်။ စာအုပ်ဝယ်သူများနှင့် သင်ကြားပေးသည့် အစီအစဥ်တွင် ပါဝင်သူများအားလုံးကို Goethe-Institut Myanmar နှင့် Myanmar Photo Archiveအဖွဲ့သားများမှ ကျေးဇူးတင်ကြောင်း စကားပါးလိုက်ပါတယ်။

Academy of Care Cohort 3 ကို ၂၀၂၄ ခုနှစ် စက်တင်ဘာလ ၂၃ ရက်နေ့ တွင် သင်တန်းသား ၁၅ ဦးဖြင့် စတင်ခဲ့ပါပြီ။ သင်တန်းပထမအပတ်မှာတော့ သင်တန်းသားတွေဟာ အခြေခံစိတ်ကျန်းမာရေးအသိပညာပိုင်းဆိုင်ရာတွေကို အာရုံစိုက်သင်ယူခဲ့ကြပြီးတော့ လက်ရှိအပတ်အနေနဲ့ သီရိလင်္ကာရှိ ပြဇာတ်ကုထုံးသုတေသနဌာနမှ သုတေသနဒါရိုက်တာ၊ သင်တန်းဆရာမှ ဦးဆောင်သည့် ပြဇာတ်ကုထုံးကို နှစ်ပတ်ကြာ ဆက်လက်ဆည်းပူးနေတာဖြစ်ပါတယ်။ ၎င်းနောက်မှာတော့ အိန္ဒိယတွင် အခြေစိုက်သည့် အတွေ့အကြုံရှိ အနုပညာစိတ်ကုထုံးပညာရှင် နှင့် နီပေါ မှ Therapeutic Music Training (TMT) ပရိုဂရမ်၏ ပူးတွဲတည်ထောင်သူဖြစ်သည့် ဂီတကုထုံးပညာရှင်တို့နှင့်အတူ အနုပညာကုထုံးနှင့် ဂီတကုထုံးကို နှစ်ပတ်ကြာ အပြိုင်လုပ်ဆောင်သွားမည်ဖြစ်ပါတယ်။

လာမည့် ကမ္ဘာ့စိတ်ကျန်းမာရေးနေ့ အထိမ်းအမှတ် ပွဲအခမ်းအနား
Mindful October: Creative Paths to Mental Wellbeing and Healing

ကမ္ဘာ့စိတ်ကျန်းမာရေးနေ့ (WMHD) အထိမ်းအမှတ်အနေနဲ့  World Mental Health Days (WMHD) event, "Mindful October: Creative Paths to Mental Wellbeing and Healing ကျင်းပပြု လုပ်သွားဖို့ရှိပါတယ်။ Academy of Care၊ ဗြိတိသျှကောင်စီ၊ ဥရောပသမဂ္ဂ၊ ပြင်သစ်ယဥ်ကျေးမှုဌာန၊ ပြည်တွင်းပါတနာအဖွဲ့အစည်း တို့နှင့်အတူ ပူးပေါင်း၍ Goethe-Institut Myanmar ၌ အောက်တိုဘာ ၁၀ ရက်မှ ၁၂ ရက်အထိ ကျင်းပသွားမှာ ဖြစ်ပါတယ်။ WMHD အစီအစဉ်သည် စိတ်ကျန်းမာရေးကောင်းမွန်ဖို့ရာအတွက် ပံ့ပိုးပေးရာမှာ အနုပညာကုထုံး၊ ဂီတကုထုံးတို့ဟာ သိသာထင်ရှားသောအကျိုးသက်ရောက်မှုတွေရှိတယ်ဆိုတာ  အဓိကပြသသွားမှာ ဖြစ်ပါတယ်။

အောက်တိုဘာလ ၁၀၊ ၁၁၊ နှင့် ၁၂ ရက်တွေမှာ အနုပညာ ဂီတ နှင့် ပြဇာတ်ကုထုံး ဖန်တီးမှုဖြင့် mental wellbeing and healing အတွက် အထောက်အပံ့ ပေးနိုင်မှုကို စူးစမ်းလေ့လာကြမည့် အလုပ်ရုံဆွေးနွေးပွဲများ  ဖိုရမ်ဆွေးနွေးပွဲများ၊ ပြဇာတ်ပြပွဲများ၊ ကဗျာဖတ်ပွဲများ နှင့် ရုပ်ရှင်ပြသပွဲများတွင်ပါဝင်ဆင်နွှဲဖို့ဖိတ်ခေါ်ပါတယ်။

အစီအစဥ်အသေးစိတ်ကို လူမှုကွန်ယက်စာမျက်နှာများတွင် ကြေညာပေးသွားမှာဖြစ်ပါတယ်။

မြန်မာဖောင့်ပြုလုပ်နိုင်ဖို့ အခြေခံ၊ အယူအဆ၊ နည်းစနစ်တွေ၊ ဆော့ဖ်ဝဲစကေး၊ Typography အကြောင်းတွေကို သင်ကြားပေးတဲ့ Myanmar Font Making Course ကို Goethe-Institut Myanmar နှင့် Talking Types ဒီဇိုင်နာတို့ စီစဉ်ပြုလုပ်ခဲ့ပါတယ်။ သင်တန်းကို မြန်မာဖောင့်ဒီဇိုင်နာတွေဖြစ်ကြတဲ့ ကိုဇင်ဘို၊ ကိုထွန်းနောင်တို့က ဦးဆောင်ခဲ့ပြီး ကိုထက်အောင်ခိုင်မှ ပါဝင်ပံ့ပိုးပေးခဲ့ပါတယ်။

သင်တန်းအကြောင်းအသေးစိတ်

သင်တန်းကို နှစ်လတာ သြဂုတ် ၃ ရက်မှ စက်တင်ဘာ ၂၁ ရက်အထိ၊ ၈ ရက်ကြာ ပြုလုပ်ခဲ့ပြီး သီအိုရီနဲ့ လက်တွေ့ ဒီဇိုင်းရေးဆွဲခြင်း သင်ခန်းစာတွေကို လေ့လာခဲ့ကြပါတယ်။ သင်တန်းကို ဖောင့်စတင်ဖန်တီးမယ့်သူတွေရဲ့ လိုအပ်ချက်တွေနဲ့ ကိုက်ညီအောင် ဖန်တီးထားပြီး အခြေခံများမှစ၍ ကျယ်ပြန့်သော သီအိုရီများ၊ အသုံးပြုနိုင်သည့် ဖောင့် ဖန်တီးခြင်းအထိ သင်တန်းသား ၈ ယောက်မှ လေ့လာခဲ့ကြပါတယ်။

သင်ခန်းစာများ
ဒီဇိုင်နာ ကိုဇင်ဘိုရဲ့ သင်ခန်းစာများ
- What is Typography
- Type Classification
- Legibility and Readability
- Stroke and Contrast
- Typeface vs Font
- Body Text vs Display

ဒီဇိုင်နာ ကိုထွန်းနောင်ရဲ့ သင်ခန်းစာများ
- Interface and Tools
- Setting your Metrics
- Starting the First Letter Frame
- Create Myanmar Alphabet
- Ligatures and Alternatives
- Spacing and Kerning
- Font Info and Exporting
- Error & Problem Solving

သင်တန်းသားများအကြောင်း

သင်တန်းကို စိတ်ဝင်စားသူများခဲ့ပြီး တက်ရောက်ခဲ့တဲ့သင်တန်းသား ၈ ယောက်မှာ မတူညီတဲ့ နောက်ခံ၊ အတွေ့ကြုံ၊ စိတ်ဝင်စားမှုတွေရှိပေမယ့် တစ်ဦးစီ သိသာထင်ရှားတဲ့ တိုးတက်မှု၊ ဆော့ဖ်ဝဲစကေး၊ တီထွင်ဖန်တီးမှုတွေကို ပြသနိုင်ခဲ့ကြပါတယ်။

သင်တန်းဆရာမှတ်ချက်များ

ဒီဇိုင်နာ ကိုထွန်းနောင်:
"Font Design Software ကို လက်တွေ့ကျကျအသုံးပြုနည်း၊ Structure နဲ့ Proportions တွေကို အသေးစိတ်ရှင်းလင်း သင်ကြားပေးသည့်အပြင် အချို့စာလုံး Design တွေကို အိမ်စာပေး ပြန်လည်သုံးသပ် မှတ်ချက်ပေးပါတယ်။ သင်တန်းသားတွေကလဲ Software Tools အသုံးပြုတာ အဆင်ပြေသလို Letterform အတွက် Creative Ideas တွေလဲ ကောင်းမွန်ပါတယ်။ 
နောက်တန်းခွဲတွေမှာ Kerning နဲ့ Metrics ကို သင်တန်းသားတွေ ပိုနားလည် သဘောပေါက်အောင် အလေးပေး သင်ရမယ်။"

ဒီဇိုင်နာ ကိုဇင်ဘို:
"မြန်မာ Graphic Design နယ်ပယ်မှာလိုအပ်နေတဲ့ Typography နဲ့ပတ်သက်ပြီး ပိုမိုစနစ်တကျရှိလာဖို့နဲ့ ပိုမိုကောင်းမွန်တဲ့ မြန်မာ Typeface တွေကိုဖန်တီးနိုင်တဲ့ Type Designers တွေ ပေါ်ထွက်လာစေဖို့အတွက် ရည်ရွယ်ပြီး ဒီသင်တန်းကို သင်ဖြစ်ခဲ့ပါတယ်။ သင်တန်းသားတွေဘက်က စိတ်ပါဝင်စားစွာ ကြိုးစားသင်ယူကြတာတွေ့ရတဲ့အတွက် အရမ်းဝမ်းသာမိပါတယ်။ 
ကျနော်တို့ကိုယ်တိုင်လဲ သူတို့ရဲ့ လိုအပ်ချက်တွေ၊ သိချင်တာတွေ၊ တွေ့ကြုံရတဲ့ အခက်အခဲတွေကနေတစ်ဆင့် အများကြီး ပြန်လည်သင်ယူလိုက်ရပါတယ်။"

ဒီဇိုင်နာ ကိုထက်အောင်ခိုင်:
"ကိုဇင်ဘိုတို့၊ ကိုထွန်းနောင်တို့ ရဲ့ အားထုတ်မှုနဲ့ သင်တန်းသားတွေရဲ့ ကြိုးစားမှုကြောင့် သင်ကြားမှု အတွေ့အကြုံတချို့နဲ့ Window OS မတူမှုကနေ ဖြစ်တတ်တဲ့ အခက်အခဲလေးတွေပါ တဖက်တလမ်းကနေ သိခွင့်ရခဲ့ပါတယ်။"

ရရှိခဲ့သော အတွေ့အကြုံနှင့် မျှော်မှန်းချက်များ

စာလုံးတွေကို ဒီဇိုင်းဆွဲရာမှာ လက်တွေ့အသုံးဝင်မှုနဲ့ ပုံသဏ္ဍာန်လှပမှုကို ချိန်ညှိပြီးတော့ လုပ်ဆောင်ရပါတယ်။ ဖောင့်တစ်ခုဖန်တီးရာမှာလည်း Width နဲ့ Weight အရွယ်အစားများအပြင် Optical တွေကို ချိန်ညှိရတဲ့ လုပ်ဆောင်ချက်ကလည်း အလွန်အဓိကကျပါတယ်။ ဖောင့်တစ်ခုရဲ့ တာဝန်မှာ စာဖတ်သူအတွက် လွယ်လွယ်ကူကူ ဖတ်နိုင်အောင်၊ အကြောင်းအရာများကို ထိထိရောက်ရောက် ပေးနိုင်အောင် အသေးစိတ် အချက်အလက်တွေအားလုံးကို ထည့်သွင်းစဉ်းစားပါတယ်။

ဒါကြောင့် ဖောင့်ကို ရည်ရွယ်ချက်နှင့် လိုအပ်ချက်အတိုင်း ဖန်တီးရတယ်။ ဖောင့်ရဲ့အနုပညာဆန်မှုသာမက၊ အသုံးပြုသူတွေအတွက် လက်တွေ့အသုံးဝင်မှုရှိပြီး မျိုးမျိုးသော ပုံသဏ္ဍာန် ၊ အပြောင်းအလဲတွေကြားမှာ လှပတဲ့ ဖောင့်တွေ ဖြစ်လာဖို့ ဂရုစိုက်ပြီး ဖန်တီးပါတယ်။ သက်ဆိုင်ရာ ပလက်ဖောင်းအားလုံးမှာ အောင်မြင်စွာ အသုံးပြုနိုင်ဖို့လဲ ဂရုစိုက်ရပါတယ်။

မြန်မာ typeface တွေ စပြီး ဖန်တီးတဲ့အခါမှာ သတိထားမိလာတာက ကျနော်တို့မှာ မြန်မာ Typography နဲ့ ပတ်သက်ပြီး တိတိကျကျမရှိသေးဘူးဆိုတာပါပဲ။ အေဒီ ၁၁ရာစုလောက်မှာ မြန်မာစာ စတင်ပေါ်ပေါက်ခဲ့ပြီး ၁၇ရာစုနောက်ပိုင်းလောက်မှာ ခဲစာလုံးတွေ သုံးလာခဲ့ပေမယ့် အသုံးပြုခဲ့တဲ့ အက္ခရာပုံစံတွေ၊ ရေးသားဖွဲ့စည်းပုံတွေကို အလွယ်တကူ ပြန်လေ့လာစရာ ရယ်လို့ တိတိပပမတွေ့ရပါဘူး။ နောက် ၁၉၈၀လောက်မှာ မြန်မာ ASCII ဖောင့်တွေ စတင်ဖန်တီးခဲ့ကြပြီး ၂၀၁၅လောက်မှာ Unicode ဖောင့်တွေကို သုံးလို့ရနေပြီဆိုပေမယ့် ဖောင့်ဖန်တီးဖို့နဲ့ အများပြည်သူသုံးဖို့ လက်ကွက်တွေ script တွေ စသဖြင့် စံသတ်မှတ်ချက်ရှိဖို့အတွက် အချိန်အတော်ကြာ ဖြေရှင်းနေခဲ့ရတာကြောင့် Typography စနစ်တွေဘက်မှာ အားနည်းခဲ့တယ်လို့ မြင်မိပါတယ်။

Typeface တွေအနေနဲ့လဲ အရင်က ဆိုင်းဘုတ်တွေ printing တွေဘက်ကိုပဲ ဦးစားပေးခဲ့တဲ့ typeface တွေသာ ခုချိန်ထိ အများစု သုံးနေကြရပါသေးတယ်။ ဒါကြောင့် ကျနော်တို့အနေနဲ့ မြန်မာ Typography, Type Design တို့နဲ့ ပတ်သက်လို့ စနစ်တကျ ပေါ်ထွန်းလာအောင် တတ်နိုင်သမျှ ကြိုးစားလေ့လာဖို့လိုအပ်ပါတယ်။ Typography နဲ့ပတ်သက်လို့ လိုအပ်တဲ့ type anatomy တွေ စတင်သတ်မှတ်ခဲ့ပြီး ရှေ့ဆက် သမိုင်းတွေကို လေ့လာပြီး Type Classification ခွဲဖို့၊ လက်တွေ့အသုံးပြုမှုတွေအတွက် အခြေခံတကျ စနစ်တကျရှိဖို့ စတာတွေ ဆက်လက်လုပ်ဆောင်ရပါအုံးမယ်။

Goethe-Institut မြန်မာတွင် ဂျာမန်စကားကိုစနစ်တကျစတင်သင်ယူပါ။ ကျွန်ုပ်တို့၏ဂျာမန်ဘာသာစကားသင်တန်းများကို ဥရောပဘာသာစကားဆိုင်ရာစံချိန်စံနှုန်းမူဘောင် (GER) နှင့်အညီ အဆင့် (၆)ဆင့်အပေါ်တွင်အခြေခံထားပါသည်။ ထို့ကြောင့် ကျွန်ုပ်တို့၏သင်တန်းများသည် နိုင်ငံတကာစံချိန်စံနှုန်းနှင့်တိုင်းတာနှိုင်းယှဥ်နိုင်ပါသည်။ Goethe-Institut မြန်မာက အောက်တိုဘာလ အတွက် (Online , In-person) ဂျာမန်ဘာသာစကားသင်တန်းများဖွင့်လှစ်လျက်ရှိပါသည်။စာရင်းပေးသွင်းရမည့်ကာလမှာ  ၃၀.၀၉.၂၀၂၄မှ ၁၀.၁၀.၂၀၂၄  အထိဖြစ်ပြီး စုံစမ်းမေးမြန်းလိုသည်များရှိပါက info.language.mmr@goethe.de မှတဆင့် အီးမေးလ်ပေးပို့ဆက်သွယ်နိုင်ပါသည်။

သင့်ရဲ့ဂျာမန်ဘာသာစကားအရည်အသွေးကိုသက်သေပြရန် ကမ္ဘာတဝှမ်းကအသိအမှတ်ပြုသောအောင်လက်မှတ်တစ်ခုလိုအပ်နေပါသလား။?

Goethe-Institut ၏ဘာသာစကားအောင်လက်မှတ်သည် ဂျာမန်ဘာသာစကားစွမ်းရည်ကိုမှတ်ကျောက်တင်ရန် ကမ္ဘာတဝှမ်းကအသိမှတ်ပြုသည့်အောင်လက်မှတ်ဖြစ်ပါသည်။ Goethe-Institut မြန်မာက အောက်တိုဘာလ အတွက် Goethe-Zertifikat စာမေးပွဲများကိုကျင်းပမည်ဖြစ်ပါသည်။ စာရင်းသွင်းကာလမှာ ၃၀.၀၉.၂၀၂၄ မှ ၀၁.၁၀.၂၀၂၄  ဖြစ်သည့်အတွက် ယခုပဲအချိန်စာရင်းကိုကြည့်ပြီး info.language.mmr@goethe.de ကိုအီးမေးလ်ပို့ပြီး စာရင်းပေးသွင်းနိုင်ပါပြီ။

စာကြည့်တိုက်ရှိ ကလေးနှင့် လူငယ်အစီအစဥ်မှ ကြိုဆိုပါတယ်။ အသက် ၆နှစ်မှ ၁၃ နှစ်အရွယ် ကလေးများအတွက် ‘Macrame for Mindfulness" Class for Kids’ ဆိုတဲ့ ပွဲလေးကို မကြာမီ ကျင်းပပြုလုပ်တော့မည်ဖြစ်ကြောင်း အသိပေးအပ်ပါတယ်။

မက်ခရာမေး /မက်ခရာမီ လို့ခေါ်တဲ့ အကူကိရိယာမပါဘဲ လက်နဲ့ ကြိုးလေးတွေ ကိုယ်တိုင်ကျစ်သည့် လက်မှုပညာရပ်ကို သင့်ကလေးအား သင်ယူစေပြီး တီထွင်ဖန်တီးနိုင်စွမ်းကိုမြှင့်တင်ပေးနိုင်ပါတယ်။ ပျော်ဖို့ကောင်းတဲ့ ဒီ hands-on class လေး မှာတော့ ကလေးများက ကီးချိန်း၊ လက်ကောက်နဲ့ နံရံမှာချိတ်ဆွဲလို့ရတဲ့အရာမျိုးလေး တို့ကို ကြိုးလေးတွေနဲ့ ဒီဇိုင်းလှလှလေးဖြစ်အောင် ကိုယ်တိုင်ဖန်တီးလုပ်ဆောင်ရမှာဖြစ်ပါတယ်။ ဒါ့အပြင် ရိုးရှင်းလွယ်ကူတဲ့ ကြိုးကျစ်ခြင်းနည်းလမ်းတွေမှတစ်ဆင့် ကလေးတွေက အသေးစားလှုပ်ရှားမှုကျွမ်းကျင်မှု၊  စိတ်ရှည်သည်းခံနိုင်မှု၊ ပြသနာကိုဖြေရှင်းနိုင်စွမ်း နှင့် mindfulness တို့ကိုပါ တိုးပွားစေမည့် ကောင်းကျိုးများ ရရှိနိုင်မှာဖြစ်ပါတယ်။ ကြိုးလေးတွေ ကျစ်နေတုန်းမှာလည်း ကလေးလေးတွေဟာ အာရုံစူးစိုက်မှုပိုမိုအားကောင်းလာပြီး စိတ်အပန်းဖြေမှုရရှိစေနိုင်ပါတယ်။ ဒါကြောင့် သင့်ကလေး၏ စိတ်လေးအေးချမ်းစေဖို့ရာ အဖက်ဖက်မှ ကောင်းကျိုးများရရှိနိုင်မည့် ကြိုးကျစ်လက်မှုပညာ ပွဲလေးကို ဝင်ရောက်ပါဝင်ဆင်နွှဲကြဖို့ ဖိတ်ခေါ်လိုက်ပါတယ်။

ဝင်ကြေးအခမဲ့ဖြစ်ပြီး၊ လူဦးရေကန့်သတ်ထားတာမို့ စာရင်းပေးသွင်းချင်တယ်ဆိုရင်တော့ -   
♦ အမည်  ♦ အသက် ♦ ဖုန်းနံပါတ် တို့ကို စာကြည့်တိုက်ဖွင့်ချိန်အတွင်း  biblio-yangon@goethe.de မှတစ်ဆင့် စာရင်းပေးသွင်းနိုင်ပါပြီ။

ဂျာမန် Level A1 ရောက်နေပြီဖြစ်တဲ့ အသက် ၁၀ နှစ်ကနေ ၁၄ နှစ်အရွယ် ကလေးများအတွက် အထူးရည်ရွယ်ပြီး Goethe-Institut Myanmar မှာ ယခုပြုလုပ်မယ့် စာဖတ်၀ိုင်းလေးကို   အသစ်စီစဥ်ပေးထားပါတယ်။

တစ်နာရီကြာမြင့်မယ့် ဒီအစီအစဥ်လေးမှာ လူငယ်စာဖတ်သူများက စိတ်၀င်စားစရာကောင်းတဲ့ ပုံပြင်လေးတွေ ၀တ္တုလေးတွေ ဖတ်ပြီး ပေါ့ပေ့ါပါးပါးနှင့် ဂျာမန်စာကို လေ့ကျင့်နိုင်မှာဖြစ်ပါတယ်။ ဒီစာဖတ်၀ိုင်းလေးက စာဖတ်ရုံလောက်ပဲ မဟုတ်ပါဘူး။ စာအတူတူဖတ်ရင်း သူငယ်ချင်းအသစ်တွေရှာလို့လည်း ရပါတယ်။ ဒါ့အပြင် ကိုယ့်စိတ်ကူးစိတ်သန်းတွေကို ဖြန့်ကျက်စေနိုင်ခြင်း နှင့် ဘာသာစကားစွမ်းရည်တွင် မိမိကိုယ်ကို ယုံကြည်မှုတိုးလာစေဖို့အတွက်ပါ ရည်ရွယ်ထားပါတယ်။
ဒါကြောင့် သင့်ကလေးကို စာအုပ်တွေကနေတစ်ဆင့် ကမ္ဘာအသစ်တွေကို စူးစမ်းရှာဖွေစေချင်တယ်ဆိုရင်၊  ဂျာမန်ဘာသာစကားကို တိုးတက်စေချင်တယ်ဆိုရင် ကျွန်ုပ်တို့ရဲ့ စာဖတ်၀ိုင်းခရီးစဥ်လေးမှာ ပါ၀င်ဖို့ တိုက်တွန်းပါရစေ။
 
လူဦးရေကန့်သတ်ထားတာမို့ စာရင်းပေးသွင်းချင်တယ်ဆိုရင်တော့ -   
♦အမည်  ♦အသက်  ♦ဖုန်းနံပါတ် တို့ကို စာကြည့်တိုက်ဖွင့်ချိန်အတွင်း  biblio-yangon@goethe.de မှတစ်ဆင့် စာရင်းပေးသွင်းနိုင်ပါပြီ။ 

ဂျာမန်ဘာသာစကား သင်ယူနေတဲ့သူတွေ စာဖတ်စွမ်းရည် တိုးတက်လာစေရန်နှင့် စကားလုံးဝေါဟာရများ ပိုကြွယ်၀လာစေရန်  လစဥ်ကျင်းပပြုလုပ်တဲ့ “Reading Club/Leseclub’’လေး ရောက်ရှိလို့လာပါပြီ။

ဒီလရဲ့ အစီအစဥ်လေးက A2 Level အတွက်ဖြစ်ပြီး  ဆရာမနဲ့အတူတူ (၂) ချိန်စလုံး စာအုပ်တစ်အုပ်တည်းကို ဖတ်ကြမှာဖြစ်ပါတယ်။ ဒါကြောင့်  (၂) ရက်စလုံး ပါ၀င်ပေးနိုင်မှသာ ထိရောက်တဲ့ စာဖတ်ခြင်း အလေ့အထကောင်းကို ပိုင်ဆိုင်နိုင်မှာဖြစ်ပါတယ်။  
 
ဒါဆို ၀ါသနာတူသူငယ်ချင်းတွေနဲ့စာတူတူဖတ်ကြရင်း အတွေးအမြင်လေးတွေ ဝေမျှဖို့  ဖိတ်ခေါ်ပါရစေနော်။
စိတ်၀င်စားလို့ ပါ၀င်ချင်တယ်ဆိုရင်တော့ biblio-yangon@goethe.de သို့ အမည်၊  ဖုန်းနံပါတ်၊ မိမိရဲ့ ဂျာမန် level ကိုအီးမေးလ်ပေးပို့ပြီး စာရင်းပေးသွင်းနိုင်ပါတယ်။

"Learning Advisory" Programလို့ ခေါ်တဲ့ "Lernberatung" အစီအစဉ်မှာ သင့်ရဲ့ ဂျာမန်စာလေ့လာမှုနဲ့ ပတ်သက်ပြီး ရင်ဆိုင်နေရတဲ့ အခက်အခဲတွေ၊ ပြဿနာတွေကို Goethe-Institut Myanmar မှ ဆရာ/ဆရာမကနေ ဆွေးနွေးအကြံပြုပေးသွားမှာ ဖြစ်ပါတယ်။ ဒီလရဲ့ ''Lernberatung'' အစီအစဉ်ကတော့ A2-level အတွက်ဖြစ်ပြီး ဂျာမန်ဘာသာစကား လေ့လာနေသူများအတွက် ဖတ်ရှုသင့်တဲ့ စာအုပ်တွေ၊ online resources တွေ၊ ကိုယ့် level နဲ့ ကိုက်ညီမယ့် အကြံပြုချက်တွေကို ဆွေးနွေးအကြံပြုပေးသွားမှာပဲ ဖြစ်ပါတယ်။

စာကြည့်တိုက်သို့ လူကိုယ်တိုင် မလာရောက်နိုင်သူတွေအတွက်လည်း ပါ၀င်မေးမြန်းလို့ရအောင် virtual online session ကိုလည်း ထည့်သွင်းစီစဉ်ပေးထားတာဖြစ်လို့ ဒီအစီအစဉ်လေးမှာ ပါ၀င်ချင်တယ်ဆိုရင်တော့ biblio-yangon@goethe.de သို့  အမည်၊ ဖုန်းနံပါတ်၊ မိမိရဲ့ ဂျာမန် level၊ မိမိမေးလိုသည့် အကြောင်းအရာ နှင့် မိမိတက်ရောက်လိုသည့်ရက် တို့ကိုအီးမေးလ်ပေးပို့ပြီး အခုပဲ စာရင်းပေးလိုက်တော့နော်။

ကျွန်ုပ်တို့ စာကြည့်တိုက်၏ လစဥ်ကျင်းပနေကြဖြစ်တဲ့ Boardgame အစီအစဥ်လေးကို ဒီလမှာတော့ စနေနေ့မှာ အတူတူဆော့ကစားကြဖို့  ပြောင်းလဲသတ်မှတ်ထားပါတယ်။ ဒီတစ်ခေါက်မှာတော့ ဆရာမနှင့်အတူတူ Flashcards ကတ်လေးတွေမှာပါရှိတဲ့ မေးခွန်းလေးတွေကို အဖြေမှန်ရှိတဲ့ကတ်လေးတွေမှာ လိုက်လံရှာဖွေရင်း ပျော်ရွှင်စရာအချိန်လေးကို ဖန်တီးကြမှာ ဖြစ်ပါတယ်။ Flashcard လေးတွေက ရိုးရှင်းပေမယ့် သင်ယူမှတ်မိနိုင်စွမ်းကို မြှင့်တင်ပေးနိုင်တဲ့ သင်ကြားရေးဂိမ်းတစ်ခုဖြစ်ပါတယ်။ ဒါကြောင့် ဝေါဟာရ  နှင့်စကားလုံးအသုံးအနှုန်းအသစ်တွေကို လွယ်ကူမြန်ဆန်စွာ သင်ယူလေ့လာနိုင်ရန် ဒီ အစီအစဥ်လေးတွင်ပါ၀င်ဖို့ ဖိတ်ခေါ်လိုက်ပါရစေ။ စကားပြောစွမ်းရည်ပိုင်း လေ့ကျင့်ဖို့အတွက်လည်း သင်နှင့်အတူတူ သူငယ်ချင်းတွေကိုပါ flashcards ဆော့ရအောင် ခေါ်ခဲ့ဖို့လည်း မမေ့နဲ့နော်။ စာကြည့်တိုက်မှာ ဆုံကြမယ်နော်။

ဒီဂိမ်းလေးကို ကစားဖို့ A2 level သာ လိုအပ်တာမို့လို့ စိတ်ပါ၀င်စားသူများအနေဖြင့် biblio-yangon@goethe.de သို့မဟုတ် 01 9376160 (ext. 301/302) ကို စာကြည့်တိုက်ဖွင့်ချိန်အတွင်း ကြိုတင်စာရင်းပေး ဆက်သွယ်နိုင်ပါတယ်။

Nora Bossong, Zora del Buono, Frank Goldammer, Daniela Krien, Ulla Lenze, Miriam Meckel, Max Oravin, Peter Stamm und Markus Thielemann တို့ရဲ့ လက်ရာများအပါအ၀င် အခြားသောမီဒီယာအသစ်များ ကျွန်ုပ်တို့ရဲ့ ဂျာမန်အွန်လိုင်းစာကြည့်တိုက် “ONLEIHE” တွင် ရောက်ရှိနေပြီ ဖြစ်ကြောင်း သတင်းကောင်းလေး ပေးချင်ပါတယ်။ အခုပဲ ကျွန်ုပ်တို့ရဲ့ “ONLEIHE” မှာ အခမဲ့ငှားရမ်းဖတ်ရှုလိုက်ပါ။