البرنامج الإرشادي للمشاريع البيئية

طوَّر

هو برنامج لتطوير المشاريع البيئية واستمرار لمشروع Floating Forward والورش اللي اتعرفتوا فيها على مفاهيم البيئة والاستدامة. في الورش دي اتكلمنا عن مواضيع بيئية متنوعة زي إدارة المخلفات، والتنوع البيئي، وتأثير مخلفات البلاستيك على نهر النيل.
ودلوقتي بنُطلق برنامج طوَّر عشان نعزز ونطور المشاريع اللي قدمتوها خلال الورش في المحافظات المختلفة.
البرنامج بيهدف لدعم الشباب تحت سن الـ ٢٧ من مختلف محافظات مصر عن طريق تدريبات وإرشادات مباشرة لتطوير منتجات وخدمات بتقدم حلول مستدامة لحماية نهر النيل والبيئات المحلية المختلفة في مصر. البرنامج ده ضمن جهود مشروع Floating Forward لنشر الوعي البيئي وتعزيز ثقافة الحفاظ على البيئة، وكمان تحفيز الشباب وتمكينهم من الوصول للأسواق المحلية بمنتجاتهم وخدماتهم المستدامة والمبتكرة.

البرنامج هيمتد لمدة ثلاثة شهور من سبتمبر لنوفمبر ٢٠٢٤، وبيتكون من ثلاث مراحل:

المرحلة الأولى:
تتضمن جلسات تدريبية لمدة ثلاثة أيام في القاهرة، هتقدروا خلالها تُكَونوا رؤية واضحة لمشروعكم ورسالته. وهتتعلموا إزاي تحددوا خصائص العملاء اللي بتستهدفوهم بمنتجات أو خدمات مشروعكم، وكمان تحددوا القنوات المناسبة لتوزيع المنتجات أو الخدمات. وكمان هتفهموا طبيعة العلاقات المهمة مع العملاء والشركاء، وإزاي تتعاملوا معاهم بفاعلية عشان تحققوا النجاح في المشروع. وهنركز على هيكلة التكاليف وإدارتها بكفاءة، بما في ذلك تحديد الموارد الأساسية اللي هتمكّن المشروع من تلبية احتياجات العملاء والتفوق في بيئة المنافسة.
الجلسات التدريبية دي هتساعدكم على إعداد نموذج مبدئي للمنتج أو الخدمة المقدمة، واللي هتجربوه وتختبروه على أرض الواقع لمدة أسبوعين تحت إشراف معهد جوته و VeryNile. هتنتهي المرحلة دي بجلسة لمدة يوم نناقش فيها التحديات اللي واجهتكم أثناء اختبار المنتج أو الخدمة، والحلول الممكنة.
  المرحلة الثانية:
تشمل شهر من التوجيهات والإرشادات المباشرة من متخصصين في مجالات إدارة الأعمال والتسويق والمشاريع البيئية ، بعدها جلسة لعرض وتقييم المشاريع المُطورة. المرحلة الثالثة:
هتستمر حوالي شهر وتشمل توجيهات مباشرة لمتابعة تطوير المشاريع، و و هتٌختَتم بحفل يتضمن تكريم وتوزيع الشهادات على المشاركات والمشاركين في المشروع.

معايير التقديم:

1. سنكم من ۲٠ لــ ٢۷ سنة.
2. اشتركتم فى واحدة من ورش عمل Floating Forward فى المحافظات.
3. مشروعكم يقدم حل مستدام لحماية النيل أو البيئة داخل محافظتكم.
4. مشروعكم له تأثير طويل المدى على بيئتكم المحيطة.
5. تقدروا تتفرعوا لمدة ۳ أيام فى الأسبوع الأول من شهر سبتمبر لحضور جلسات التدريب، ويوم فى النصف الأخير من شهر سبتمبر، ويوم تاني فى النصف الأخير من شهر أكتوبر.
6. تقدروا تسافروا القاهرة للمشاركة فى التدريبات، مع العلم أن المعهد هيتكفل بمصاريف السفر والإقامة (شامل الفطار والغدا).
7. تقدروا توفروا على الأقل ٤ ساعات في الاسبوع في الفترة من سبتمبر لنوفمبر لتطوير المشروع.

الجدول الزمنى:

• التقديم: من ٢٢ يوليو حتى ٢۷ يوليو ۲٠۲٤
• بداية عملية الاختيار: ٢۸ يوليو ۲٠۲٤
• التواصل مع المشاركين فى البرنامج: لحد ٢٢ أغسطس ۲٠۲٤
• تدريب وتوجيه وإرشاد: سبتمبر لنوفمبر ۲٠۲٤
• حفل ختام المشروع: نوفمبر ۲٠۲٤

طريقة الاشتراك:

• راجعوا معايير الالتحاق كويس قبل ما تبعتوا نموذج التقديم.
• ابعتوا نموذج التقديم بحد أقصي ٢٧ يوليو ٢٠٢٤.

تابعوا الإيميلات هتوصلكم رسالة على الإيميل بخصوص التقديم بتاعكم خلال ٤ أسابيع، هنبلغكم فيها موقفكم من الاشتراك في البرنامج. راجعوا كمان الرسائل العشوائية (Spam) في الإيميل.

لو عندكم أسئلة ابعتولنا على الإيميلات دي:
mohab.alazazy@goethe.de
marwa.abdel-ati@goethe.de

البرنامج مُقدم من معهد جوته بالقاهرة فى إطار مشروع Floating Forward بالتعاون مع VeryNile.