ကမ္ဘာအနှံ့ဖြစ်ပွားသော ကိုဗစ်-၁၉
ကိုရိုနာဗိုင်းရပ်စ်က ကျွန်ုပ်တို့ဘဝတွေကို ဘယ်လိုမျိုး ပြောင်းလဲပစ်နေတာလဲ။

SARS-CoV-2 ကမ္ဘာ့ကပ်ရောဂါသည် ၂၀၂၀ ခုနှစ် နွေဦး ပေါက်အချိန်ကတည်းက ကမ္ဘာကြီးကို ရပ်တန့် ထိန်းချုပ်ပစ်ခဲ့သည်။ ကျွန်ုပ်တို့၏နေ့စဉ်ဘဝများကို ထင်ထင်ရှားရှား ပြောင်းလဲမှုများက ရောဂါပျံ့နှံ့မှုကို နှေးကွေးသွားစေလိမ့်မည်ဟု ယူဆထားခဲ့ကြသည်။ ကျွန်ုပ်တို့ လူ့အဖွဲ့ အစည်း၏ အချို့နေရာများအပေါ် ကိုရိုနာဗိုင်းရပ်စ် သက်ရောက်မှုသည် တာရှည်သွားနိုင်သည်။ တိုးတက်ဖြစ်ထွန်းလာမှုတို့ကို ယခုအချိန်အထိ ကျွန်ုပ်တို့ မြင်တွေ့နေကြသည်။

သဘာဝပတ်ဝန်းကျင် - ခေတ္တခဏရပ်ဆိုင်းမှုသာ။

 
အပျော်စီးသင်္ဘောများသာ ပုံမှန်ပြေးဆွဲလေ့ရှိသော ရေပြင်တွင် လင်းပိုင်များကိုတွေ့ရှိရခြင်းသည် ကိုဗစ်-၁၉ ကပ်ရောဂါကာလအတွင်း ဗင်းနစ်မှလာသော သတင်းကောင်းအဖြစ် ကမ္ဘာတစ်ဝှန်း၌ ယူဆခဲ့ကြသည်။ သို့သော် ဗီဒီယိုတွင် ဗင်းနစ်မြို့မှ လင်းပိုင်များကို မပြသကြောင်း သဘာဝပတ်ဝန်းကျင်ဆိုင်ရာ အဖွဲ့အစည်း Green Peace အဖွဲ့က ထောက်ပြပြီး၊  လီဆယ်မှုဖြစ်ကြောင်း ချက်ချင်းပင် တုန့်ပြန်သည်။ သို့သော် အီတလီနိုင်ငံ Sardinian ကျွန်း၏ မြို့တော် Cagliari တွင် အထူးအဆန်း မြင်ကွင်းမဟုတ်ကြောင်း ပြောကြသည်။ ဗင်းနစ်မြို့ရှိ ပိုမို၍ ကြည်လင်လာသောရေသည် ရေအရည်အသွေး တိုးတက်လာမှု၏ လက္ခဏာတစ်ရပ် မဟုတ်ပေ။ ရေကို နောက်ကျိအောင် လုပ်တတ်သော အနည်များ အနည်ထိုင်ဖို့အချိန်ရသွားခြင်းသာဖြစ်သည်။ သို့ဆိုပါက ကိုရိုနာဗိုင်းရပ်စ် အကြပ်အတည်းက သဘာဝလောကကြီးကို ကောင်းကျိုးဆောင်ခဲ့ခြင်းလား။ လမ်းမများပေါ်တွင် ကားအရေအတွက် ပိုမိုနည်းပါးသွားခြင်း၊ အချို့နေရာများတွင် စက်မှုထုတ်လုပ်မှုတို့ ရပ်တန့်သွားခြင်း၊ လူသူစွန့်ခွာ ရုံးများ၊ လေယာဉ်များ ရပ်ဆိုင်းထားခြင်း စသည်တို့အရ ဗိုင်းရပ်စ်သည် ရာသီဥတုကို ကယ်တင်ဖို့ အကူအညီပေးနိုင်သည်ဟု ထင်မြင်ဖို့ လွယ်ကူသည်။ ဂျာမန်သဘာဝပတ်ဝန်းကျင် အေဂျင်စီက ရှုထောင့်တစ်ရပ်ပေးသည်။ “တကယ်လို့ ကိုရိုနာဗိုင်းရပ်စ် အကြပ်အတည်းက လေအရည်အသွေး၊ ဖန်လုံအိမ် ဓာတ်ငွေ့ထုတ်လွှတ်မှု၊ ဆူညံသံနဲ့ ဆက်စပ်တဲ့ ကျန်းမာရေးအန္တရာယ်များပေါ်မှာ ကောင်းမွန်တဲ့ သက်ရောက်မှု ရှိတယ်ဆိုရင် အဲဒါက ယာယီအခိုက်အတန့်ပဲ။” ရေရှည်အတွက် ကျွန်ုပ်တို့၏ စားသုံးမှု၊ ရွေ့လျားမှုပုံစံတွေ၊ အခြေခံ အဆောက်အအုံတွေကို ပြောင်းလဲဖို့ သဘာဝ ပတ်ဝန်း ကျင်ဆိုင်ရာ မူဝါဒတွေကို ထုတ်ပြန်တော့မှ ရေရှည်တည်တံ့တဲ့ တိုးတက်မှုကို ရရှိနိုင်မှာ ဖြစ်ကြောင်း အေဂျင်စီက ပြောသည်။ ပုံမှန်အင်္ဂလိပ် စကားအရ အကယ်၍ အကြပ်အတည်းအပြီး စီးပွားရေး ပုံမှန်အတိုင်း ပြန်လည်ပတ်ခဲ့ပါလျှင် ယာဉ်အသွားအလာ ပြန်ပြီးတိုးတက်လာချေမည်။ ယင်းနှင့်အတူ သဘာဝ ပတ်ဝန်းကျင် ပျက်ဆီးမှုသည်လည်း မြင့်တက်လိုက်ပါလာပေမည်။

စီးပွားရေး - ဆိုးဆိုးဝါးဝါး စီးပွားရေးကျဆင်းမှု။

 
အထူးသဖြင့် အမေရိကန်ပြည်ထောင်စုနှင့်စပ်လျဉ်း၍ ကိုဗစ်-၁၉ လော့ဒေါင်းနှင့် တွဲဖက်နိုင်ငံခြားကုန်သွယ်မှု စိန်ခေါ်ချက်များက ဂျာမနီနိုင်ငံအား စီးပွားရေး ကျဆင်းမှုတစ်ခုဆီသို့တွန်းပို့ပေးလိုက်သည်။ ဖက်ဒရယ် စာရင်းရုံးအဆိုအရ ပုဂ္ဂလိကစားသုံးသူသုံးစွဲမှုသည် စက်ယန္တရား၊ ပစ္စည်းပစ္စယနှင့် ယာဉ်များတွင် ရင်းနှီးမြုပ်နှံမှုနှင့်အတူ အပြင်းထန်ဆုံးထိခိုက်သည်။ ၂၀၂၀ ခုနှစ် ပထမ လေးလပတ်တွင် ပြည်တွင်းထုတ်ကုန် စုစုပေါင်းသည် ၂.၂ ရာခိုင်နှုန်းဆုံးရှုံးသွားသည်။ သို့သော် အခြားကြီးမားသော ဥရောပနိုင်ငံများနှင့် နှိုင်းယှဉ်ပါက ဂျာမနီနိုင်ငံသည် အလွန်ကောင်းမွန်သော အခြေအနေတွင်ရှိနေဆဲဖြစ်သည်။ ဂျာမဏီနိုင်ငံပြီးနောက် ဥရောပဇုန်၏ စီးပွားရေးတွင် ဒုတိယအကြီးဆုံးဖြစ်သော ပြင်သစ်နိုင်ငံသည် ၂၀၂၀ ခုနှစ် ဇန်နဝါရီလနှင့် ဧပြီလ တို့အကြား ဂျီဒီပီ ၅.၈ ရာခိုင်နှုန်း ကျဆင်းသွားပြီး၊ တတိယအဆင့်ရှိ အီတလီနိုင်ငံသည် ကိန်းဂဏန်းမှာ ၄. ၇ ရာခိုင်နှုန်း ဖြစ်သည်။ စီးပွားရေး ပညာရှင်များခန့်မှန်းကြသည်က ဤပထမလေးလပတ် စီးပွားရေးကျဆင်းမှုသည် အောက်ဆုံးကြမ်းပြင်အထိသို့ ယခုအချိန်ထိ မထိသေးပေ။ ဂျာမနီအစိုးရက ၂၀၂၀ ခုနှစ်ကို စစ်ကြီးပြီးနောက် သမိုင်းတွင် အဆိုးဆုံး ကြပ်တည်းမှု အဖြစ် ခြုံငုံလျက် မျှော်လင့်ထားသည်။ ဂျာမနီ၏ စီးပွားရေးကျွမ်းကျင်သူများကောင်စီကလတ်တလော ခန့်မှန်းချက်များအရ ဂျာမနီနိုင်ငံ၏ ပြည်တွင်းထုတ်ကုန် စုစုပေါင်းသည် ၂၀၂၀ ခုနှစ်တွင် ၆ ရာခိုင်နှုန်းမှသည် ၇ ရာခိုင်နှုန်းအထိ ကျုံ့ဝင်သွားလိမ့်မည်။ နှိုင်းယှဉ်ကြည့်လျှင် ၂၀၀၉ ခုနှစ် ကမ္ဘာ့ စီးပွားရေး နှင့် ငွေကြေးအကြပ်အတည်း ကာလအတွင်း ဂျာမနီနိုင်ငံ၏ ပြည်တွင်းအသားတင်ထုတ်ကုန်သည် ၅.၇ ရာခိုင်နှုန်းအထိ ကျဆင်းခဲ့သည်။ ကိုရိုနာဗိုင်းရပ်စ် အကြပ်အတည်းကာလအတွင်း ဂျာမနီနိုင်ငံတွင် အလုပ်လက်မဲ့ဖြစ်မှု များပြားလာသည်။ ၂၀၂၀ ခုနှစ် ဇွန်လတွင် အလုပ်လက်မဲ့နှုန်းမှာ ၆.၂ ရာ ခိုင်နှုန်းရှိကာ၊ ၂၀၁၉ ခုနှစ် ဇွန်လထက် ၁.၃ ရာခိုင်နှုန်း ပိုမြင့်မား၍၊ ယခင်နှစ်ကထက် အလုပ်မှထွက်ရသောလူ ၆၄၀, ၀၀၀ ခန့်ပိုသည်။

အလုပ်လုပ်သောကမ္ဘာများ - ပေါင်းစပ်ဖြေရှင်းမှုများက ပြုပြင်ပြောင်းလဲလွယ်ကူမှုအသစ်ကို ယူဆောင်လာပေးသည်။

 
လော့ဒေါင်းကာလအတွင်း လူအများအပြားက အချိန်တိုအလုပ်ကို လုပ်ကိုင်ရစဉ်၊ လက်ရှိ ဝင်ငွေဆုံးရှုံးမှု ကြုံတွေ့နေရစဉ်၊ သို့မဟုတ် အလုပ်လက်မဲ့ ခြိမ်းခြောက်မှု ကြုံတွေ့နေရစဉ်၊ ဥပမာအားဖြင့် အစားအစာပံ့ပိုးမှု သို့မဟုတ် ကျန်းမာရေး စောင့်ရှောက်မှုတို့တွင်လုပ်ကိုင်နေသော အခြားအလုပ်သမားများသည် ပိုမိုလေးလံသော အလုပ်ဝန်များနှင့် ကူးစက်နိုင်ချေ မြင့်မားမှုကို ကြုံတွေ့နေရသည်။ အခြားကဏ္ဍများက အိမ်မှအလုပ်လုပ်ခြင်းဆီသို့ ပြောင်းရွှေ့ လုပ်ကိုင်ကြသည်။ Twitter ကဲ့သို့ Microblogging (မိုက်ခရိုဘလော့ဂင်း) ဝန်ဆောင်မှု သည် အစောပိုင်းကာလ မတ်လအလယ်ကတည်းက ဝန်ထမ်းများကို အိမ်ကိုပြန်လွှတ်ကာ အလုပ်လုပ်ခိုင်းသည်။ သူတို့၏ရုံးများသည် အနည်းဆုံး ၂၀၂၀ ခုနှစ် စက်တင်ဘာလအထိ ပိတ်ထားမည်ဖြစ်သည်။ ထိုအချိန်ကျမှ ရုံးအလုပ်ဘဝဆီသို့ ပြန်သွားချင်ကြသလား၊ ဘယ်အချိန် ပြန်သွားချင်ကြမှာလဲဆိုသည်ကို အလုပ်သမားများကဆုံးဖြတ်နိုင်ပါမည်။ ဤအခြေအနေက အစဉ်အလာအရ လူကိုယ်တိုင် လုပ်ဆောင်ရသော ရုံးသည် ခေတ်နောက်ကျနေပြီး အသစ်အနေဖြင့် ပို၍လိုက်လျောညီထွေရှိသော ရွေးချယ်စရာများက လုပ်ဆောင်နိုင်မှုနှင့် ထိရောက်မှုရှိသည်ကို သက်သေပြနေသည်။ ဝန်ထမ်းအချို့က ရုံးတက်ရပြီး၊ အချို့ဝန်ထမ်းတို့က ရွှေ့ လျားသွားလာရသည် သို့မဟုတ် အိမ်ရှိအလုပ်ခန်းတွင် အလုပ်လုပ်ခြင်းဖြစ်သော “နှစ်မျိုးစပ် အလုပ်လုပ်ခြင်း” သည် ရှေ့ရောက်သော နည်းတစ်နည်းဖြစ်ကြောင်း လူ့စွမ်းအားအရင်းအမြစ် အတွက် ဖြေရှင်းနည်းကိုလေ့လာမှုတစ်ခု ထောက်ပံ့ပေးသော Adecco က အကြံပြုသည်။ ဝန်ထမ်းများသည်လည်း အနာဂတ်ကာလတွင် စီးပွားရေးအရ ခရီးသွားလာမှု အရေအတွက်ကိုလည်းကောင်း၊ မျက်နှာချင်းဆိုင်တွေ့ ဆုံမှုများကိုလည်းကောင်း လျော့ချနိုင်သည့် ဗီဒီယိုဖြင့် ညီလာခံကျင်းပခြင်းကဲ့သို့သော နည်းပညာအသစ်များကို ထိတွေ့ လုပ်ဆောင်ဖို့ တွန်းအားပေးခံရသည်။ ဤအချက်က အများပြည်သူ သွားလာရာယာဉ်လမ်းတွင် ယာဉ်ကြောပိတ်ဆို့မှု လျော့နည်းစေပြီး၊ ရက်သတ္တပတ်အတွင်း ပြည်တွင်း လေယာဉ်ပျံသန်းမှုအရေအတွက်လည်း လျော့နည်းသွားစေခြင်း စသည့် ရွှေ့လျားသွားလာမှု အပေါ်တွင် သက်ရောက်မှုရှိပါသည်။ ကိုရိုနာဗိုင်းရပ်စ် အကြပ်အတည်းကြောင့် အချိန်နာရီအပေါ်အခြေတည်သော စာချုပ်များချုပ်ဆိုမှု၊ ဝန်ထမ်းများက တင်းကြပ်သော နာရီ ၄၀ ပုံစံကို လက်ခံလိုစိတ် နည်းပါးလာခြင်း ကြောင့် တစ်ပတ်လျှင် နာရီလေးဆယ် အလုပ်ချိန်တို့၏ အဆုံးသတ်ရှေ့ ပြေးဖြစ်သည်။ သုံးပုံနှစ်ပုံ (၆၉ ရာခိုင်နှုန်း) ကျော်က “ရလဒ်ဦးတည်အလုပ်လုပ်ခြင်း”ကို နှစ်သက်သဘောကျကြပြီး စာချုပ်များကို တိကျသော အလုပ်ချိန်ပေါ်တွင် အခြေမခံပဲ သဘောတူထားသော ရည်မှန်းချက်ပြည့်မြောက်ခြင်း အပေါ်တွင်သာ အခြေခံထားကြသည်။

မီဒီယာ - အစဉ်အလာ ရုပ်မြင်သံကြားကြည့်ရှုခြင်းဆီ သို့ ပြန်လှည့်ခြင်း။

 
ကပ်ရောဂါကာလအတွင်း မီဒီယာသုံးစွဲမှု တိုးတက်လာ သည်မှာ အံ့ဩစရာမဟုတ်ပေ။  Deutsche Welleကဲ့သို့ သတင်းများကိုပံ့ပိုးပေးသည့်ဌာနများက သူတို့၏အွန်လိုင်းကုန်ပစ္စည်းများအား လာရောက်ကြည့်ရှုသော ကိန်းဂဏန်းမှတ်တမ်းကို အစီရင်ခံတင်ပြသည်။ သတင်းဆိုသည်မှာ အချိန်၏ပုံစံဖြစ်ပြီး၊ ပုံသဏ္ဍာန်အမျိုးမျိုးဖြင့်လည်း တောင်းဆိုတတ်ကြသည်။ အကြံပေးကုမ္ပဏီ Deloitte ၏ ဒီဂျစ်တယ်မီဒီယာရေစီးကြောင်းစစ်တမ်းအရ ကြော်ငြာဖြင့်ထောက်ပံ့သော အွန်လိုင်းသတင်းများကို နေ့စဉ်ဖတ်ရှုသူ အရေအတွက်သည် ဂျာမနီနိုင်ငံတစ်ဝှန်းလုံးတွင် ၃၅ ရာခိုင်နှုန်း မြင့်တက်ခဲ့သည်။ ပို၍ပို၍သော အသုံးပြုသူများသည် ရုပ်သံအကြောင်းအရာအတွက် ငွေပေးရန် ပြင်ဆင်လာကြသည်။ ငွေပေးချေရသော အရည်အသွေးကောင်းတဲ့အကြောင်းအရာကို ပုံမှန်သုံးစွဲမှုသည် ၂၅ ရာခိုင်နှုန်းမြင့်တက်လာကာ၊ သတင်းစာများကို pdfs အဖြစ် သို့မဟုတ် အပလီကေးရှင်းတို့မှ ဝယ်ယူသုံးစွဲခြင်းတို့သည် ၃၁ ရာခိုင်နှုန်းအထိ တိုးတက်လာသည်။ အစဉ်အလာရုပ်သံသည်လည်း တစ်ခေတ်ဆန်းသစ်မှုကို ကြုံတွေ့ရပြန်သည်။ Deloitteစစ်တမ်းအရ ၂၁ ရာခိုင်နှုန်းသည် ကမ္ဘာ့ကပ်မတိုင်မီကထက် တစ်ရက်လျှင် နှစ်နာရီပိုမိုကြာမြင့်စွာ ရုပ်မြင်သံကြားကို ကြည့်ရှုကြောင်း အစီရင်ခံသည်။  ရုပ်သံသုံးစွဲမှု ဆက်တိုက်အားဖြင့်ရော သိသိသာသာအားဖြင့်ရော ကျဆင်းနေသာ လူငယ်ဦးတည်အဖွဲ့များသည်ပင်လျှင် အစဉ်အလာ ရုပ်သံအား ပြန်လည် အသုံးပြုလာကြသည်။ ဤပြန်လည်ဖြစ်ထွန်းလာမှုသည် video on demand (VOD) သို့ မရောက်ရှိလာပေ။ VOD အသုံးပြုသူထက်ဝက်နီးပါးက ကိုရိုနာဗိုင်းရပ်ကွာရင်တင်း မတိုင်ခင်ကထက် အကြောင်းအရာကို သိသိသာသာ ပိုမိုသုံးစွဲသည်ဟု အစီရင်ခံသည်။ စစ်တမ်းကောက်ယူထားသော  သုံးဆယ်ရာခိုင်နှုန်းက ရေဒီယိုကို ပိုပြီးနားထောင်ကြကြောင်း ပြောကြသည်။ အထူးအားဖြင့် Podcasts များသည် လူကြိုက်များလာကြပြီး၊ နည်းပညာဖြစ်တည်မှုထက် ပိုပြီး ကျယ်ပြန့်လာသည်။ Podcasts တို့သည် သမားရိုးကျရုပ်သံ သို့မဟုတ် ရေဒီယိုသတင်း အစီအစဉ်တို့ထက် အကြောင်းအရာ ပို၍နက်နက်နဲနဲရှိပြီး အချက်အလက်အသုံးပြုသူများ တန်ဖိုးထား နှစ်ခြိုက်သော သက်ဆိုင်သည့် နောက်ခံကိုလည်း ပံ့ပိုးပေးသည်။ ကပ်ရောဂါကို စိုးရိမ်မှုနှင့်အတူ သုံးစွဲသူအများအပြားသည် အစဉ်အလာ မီဒီယာ ပံ့ပိုးသူများဆီသို့ ပြန်လှည့်ကြသည်။ ၂၀၂၀ ခုနှစ် နွေရာသီတွင် ထုတ်ပြန်သော Reuters သတင်းဌာန၏ လေ့လာမှုတစ်ရပ်အရ ထိုကဲ့သို့မီဒီယာများသည် လူမှုမီဒီယာထက် ယုံကြည်ရမှု အဆင့်ပိုပြီးမြင့်သည်။ ကမ္ဘာ့ကပ်ရောဂါသည် ဝိရောဓိတစ်ခုဖြစ်လာကာ သုံးစွဲမှုပိုမိုမြင့်လာစဉ်ကတည်းက ထုတ်လုပ်သူများသည် လေးနက်သော ငွေကြေးပြဿနာများကို ကြုံတွေ့ရင်ဆိုင်နေရသည်။ အကြောင်းမှာ သူတို့၏ ကြော်ငြာဝင်ငွေများသည် အကြပ်အတည်းကြောင့် ပြိုကျပျက်စီးသွားသည့်အတွက် ဖြစ်သည်။

အွန်လိုင်းဆီသို့ အနုပညာဈေးကွက် ပြောင်းရွှေ့ ခြင်း။

 
၂၀၂၀ ခုနှစ် ဇူလိုင်လတွင် Art Fair Mannheim သည် အွန်လိုင်းပေါ်သို့ ပထမဆုံးအဖြစ် လုံးဝရောက်သွားသည်။ ကပ်ရောဂါကာလအတွင်း အနုပညာလောက သည် တိုက်ရိုက်ထုတ်လွှင့်မှု၊ ရုပ်သံထုတ်လွှင့်မှုနှင့် ဒီဂျစ်တယ်ပြပွဲများ ဖြစ်ကုန်သည်။ သူတို့ရွေးချယ်ထားသော ပြခန်းပိုင်ရှင်များထံမှ ဝယ်ယူရမည့်အစား စမာ့တ်ဖုန်းမှတစ်ဆင့် ပန်းချီကားများဝယ်ယူသော စီးပွားရေးနှင့် ငွေကြေးလောကမှစုဆောင်းသူများကို  သမားရိုးကျ အနုပညာဈေးကွက်က မျက်စောင်းထိုး ကြည့်နေခဲ့သည်မှာ ကာလကြာမြင့်ခဲ့ပါပြီ။ ကိုရိုနာဗိုင်းရပ်စ်သည် အလားအလာတစ်ခုကို ပြောင်းပြန်လှန်ပစ်နိုင်သည်။ အကြပ်အတည်းကြောင့် အွန်လိုင်းကုန်သွယ်မှုသည် အနုပညာလောကအတွက် ပိုပြီးအရေးပါလာသည်။ ဘာလင်မြို့မှ ပြခန်းပိုင်ရှင် Thomas Fischer က သူ့အနုပညာရှင်များ၏ လက်ရာတို့ကို ဖော်ပြရန် အရောင်းအဝယ်ပလက်ဖောင်းဖြစ်သော BerlinViews.com ကို အသုံးပြုသည်။ “ဝက်ဘ်ဆိုက်က ဘာလင်မြို့ကပြခန်း ၂၅ ခန်းလောက်ကို သူတို့ရဲ့ စာရင်းထဲမှာ တစ်ကြိမ်ကို အနုပညာရှင်တစ်ယောက် ဖော်ပြပေးပြီး၊ ပန်းချီကားတွေကိုလည်း ရောင်းပေးဖို့ နည်းလမ်းတစ်ခု ကမ်းလှမ်းတယ်။” ဤရေပန်းစားလာမှုသည် မြေအောက်ပြခန်းများ၊ အခြားနည်းလမ်း အသုံးပြုသောနေရာများ၊ တစ်ဆင့်ခံယဉ်ကျေးမှုများ နှင့် အနုပညာကျောင်းသမိုင်းတို့တွင် မကြာမီ ရှာဖွေမှု အသစ်များဖြစ်လာနိုင်၍၊ ငယ်ရွယ်ပြီး လူသိနည်းပါးသော အနုပညာရှင်များ ဈေးကွက်သို့ဝင်ရောက်ရန် ပိုမို ခက်ခဲလာနိုင်သည်ဟု အချို့လေ့လာသုံးသပ်သူများက စိုးရိမ်ကြသည်။ Fischer က ယင်းအချက်သည် စီးပွားရေးဆန်လွန်းသော နေရာများအတွက် ပိုပြီး ပြဿနာဖြစ်နိုင်သည်ဟု ခံစားမိသည်။ Stuttgart မြို့ ရှိ နာမည်ကျော် လေလံအဆောက်အအုံဖြစ်သော Nagel လေလံရုံသည် ငွေကြေးအခက်အခဲနှင့် ကြုံတွေ့နေရပြီး၊ Cologne မှသည် Brussels နှင့် Switzerland အထိ ကျင်းပသော နာမည်ကျော်အနုပညာပွဲတော်များလည်း ဖျက်သိမ်းပစ် ရသည်။ ပန်းချီကားများကို သီးသန့် ကြည့်ရှုခြင်းကဲ့သို့ အနုပညာလုပ်ငန်းရှိ တစ်ကြိမ်သာ ကျင်းပဖြစ်သော ပွဲများအတွက် သူက သိပ်ပြီး အရေးမထားချေ။ “ပြခန်းအများစုအတွက်က စိတ်ဝင်စားတဲ့ အဖွဲ့တွေနဲ့ရေရှည်ဆက်ဆံရေးကို တည်ထောင်ဖို့က အဓိကအချက်ပဲ။ ပြတိုက်တာဝန်ခံ (ကျူရေတာ) တစ်ယောက်က ပန်းချီကားသီးသန့်ကြည့်ရှုခြင်း တစ်ခုဆီကို အမြဲတမ်း မလာနိုင်ဘူး။ လိုအပ်ရင် ကြိုတင်ချိန်းဆိုတာ လုပ်လိမ့်မယ်”။ သူ့အတွေ့အကြုံအရ ယဉ်ကျေးမှုနေရာဌာနများ ယာယီပိတ်သိမ်းခြင်းက အနုပညာရှင်များ အနုပညာ ဖန်တီးမှုကို မတားဆီးနိုင်ပါ။

ပြဇာတ် - ငွေပမာဏဘယ်လောက်ဆို လုံလောက်ပြီလဲ။

 
၂၀၂၀ ခုနှစ် နွေရာသီတွင် လူတစ်ဦးနှင့်တစ်ဦးခြား၍ နေခြင်းနှင့် ကျန်းမာရေးစည်းမျဉ်းများအတိုင်း လိုက်နာသရွေ့ ဂျာမနီနိုင်ငံသည် ယဉ်ကျေးမှုအခမ်းအနားများကို တဖန်ပြန်လည် ခွင့်ပြုခဲ့သည်။ သို့သော် ပွဲတက်ရောက်သူများက ဘေးကင်းသော အကွာအဝေးတစ်ခုတွင်နေ၍ တက်ရောက်သော ဟင်းလင်းပြင်စင်တင်ပွဲများ၊ အခန်းပြင်ပ ပွဲတော်များ၊ အများပြည်သူဆိုင်ရာနေရာများတွင် ကျင်းပသော ပြဇာတ်ငယ်ပုံစံများဖြစ်စေ၊ စင်တင်ပွဲများတွင် ခုံနေရာများလျှော့၍ဖြစ်စေ ရလဒ်အားလုံးသည် နိမ့်ပါးသော ဝင်ငွေနှင့် ထုတ်လုပ်မှုများအတွက် နည်းပါးသော ရန်ပုံငွေသာဖြစ်သည်။ နိုင်ငံပိုင်ပြဇာတ်ရုံများသည် ပုဂ္ဂလိကပြဇာတ်ရုံများ၊ လွတ်လပ်စတိတ်စင်များနှင့် အလွတ်တန်း အနုပညာရှင်များလောက် ထိခိုက်မှုမရှိပေ။ ကမ္ဘာ့ကပ်ရောဂါမဖြစ်ခင်က ကမ္ဘာပေါ်ရှိ ဘယ်နေရာမှာမှ ဂျာမနီနိုင်ငံလောက် ပြဇာတ်ရုံများ၊ ပြတိုက်များနှင့် စင်တင်ဖျော်ဖြေပွဲရုံများ မများပြားပေ။ လူထု ဆင်ဖိုနီ (သံစုံတီးဝိုင်အတွက်တေးသွား)နှင့် ချိန်ဘာ (တူရိယာနည်းနည်းဖြင့်တီးမှုတ်ဖြေဖျော်မှု) သံစုံတီးဝိုင်း ၁၃၀၊ ပြတိုက်ပေါင်း ၆၈၀၀ ခန့်၊ ပွဲတော် ခန်းမ ၄၀ နှင့် ပွဲတော် ၇၀၀၀ ခန့်မှာ ဂျာမနီ အမျိုးသားယဉ်ကျေးမှုမူဝါဒ၏ အမွေအနှစ်တို့ဖြစ်ကြသည်။ ဒေသခံအစိုးရများသည် ယဉ်ကျေးမှုကဏ္ဍအတွက် တာဝန်ရှိကြသည်။ သို့သော် ကမ္ဘာ့ကပ်ရောဂါ၏ တိုးတက်လာနေသော ဝန်ထုပ်ဝန်ပိုးကို ကိုင်တွယ်ဖြေရှင်းဖို့ ကြိုးစားနေရသည်။ “ကပ်ရောဂါ ပြီးတဲ့အခါ ပုဂ္ဂလိက လောကမှာ ငွေဘယ်လောက် ကျန်သလဲ၊ ဘယ်လို ငွေကြေးထောက်ပံ့မှုမျိုးတွေ ဆက်လုပ်ရမလဲဆိုတာ ကျွန်မတို့ တွက်ဆရမယ်” ဟု ယဉ်ကျေးမှုမူဝါဒ ကျွမ်းကျင်သူ Julius Heinicke က Deutsche Welle နှင့် တွေ့ဆုံမေးမြန်းမှုတစ်ခုတွင် ရှင်းလင်းပြောကြားသည်။ ဂျာမန်အစိုးရသည် ၂၀၂၀ နှင့် ၂၀၂၁ အတွက် ၄င်း၏ “စတင်မှုအသစ်” အစုံလိုက်အဆိုပြုကမ်းလှမ်းချက်တွင် ယဉ်ကျေးမှုလုပ်ငန်းအတွက် ယူရို ၁ ဘီလီလျံခန့်ကို ဖယ်ထားပြီးဖြစ်သည်။