Ինֆորմատիկա

Ամպային տեխնոլոգիաները ՏՏ ծառայությունները դարձնում են ավելի դյուրին և ոչ ծախսատար։ «Ամպում» յուրաքանչյուրը կարող է վարձակալել այնքան հաշվողական հզորություն, տարածք ու ծրագրաշար, որքան ցանկանում է։ Այնուամենայնիվ, շատ անհատներ և ընկերություններ թերահավատ են։ Նրանք վախենում են իրենց տվյալների անվտանգության համար։ Այդ իսկ պատճառով Գերմանիայի էկոնոմիկայի և տեխնոլոգիաների դաշնային նախարարությունը աջակցում է տարբեր հետազոտական ծրագրերի, որոնք ուղղված են ամպային տեխնոլոգիաների հուսալիության և անվտանգության բարելավմանը։

Ֆրաունհոֆերի ընկերակցության հետազոտողները մշակում են հայեցակարգ «արտադրական տվյալների հուսալի տարածքի» համար։ Այս բաց տարածքում ձեռնարկությունները հետագայում կկարողանան ինտեգրվել միջճյուղային ցանցերին՝ առանց սեփական տվյալների վերահսկողությունը կորցնելու։

Ամպային անվտանգության լաբորատորիան (Cloud Security Lab) աշխատում է տվյալների անվտանգության ապահովման ուղղությամբ

Վարկային քարտ, բանկային քարտ, ապահովագրական քարտ, հաճախորդի քարտ․ կյանքն առանց չիպային քարտերի այսօր կարծես թե դժվար է պատկերացնել։ Ռադիոտեխնիկ Յուրգեն Դեթլոֆը առաջին մարդն է, ում մտքով անցել է, որ քարտերի վրա կարելի է տեղեկատվություն պահել։

1969-ին նա գրանցում է ինտեգրված միկրոսխեմայով պլաստիկ քարտի արտոնագիրը։ 1977-ին ստեղծվում է այսօր մեծ տարածում ստացած միկրոպրոցեսորային քարտը։ Առաջին չիպային քարտերը վաճառքի են հանվում հեռախոսային քարտերի տեսքով։ 1990-ականների վերջին հայտնվում են բանկային քարտերը, որոնք շուտով ընդունվում են աշխարհի շատ խանութների կողմից։ Ժամանակի հետ փոքրիկ միկրոպրոցեսորները տվյալների ավելի մեծ ծավալ են կարողանում պահել ու մշակել, իսկ չիպային քարտերը կամաց-կամաց վերածվում են մինիհամակարգիչների։

Այսօր գրեթե բոլորն իրենց դրամապանակներում ունեն մի քանի չիպային քարտ

Շոգեմեքենաներ, հոսքագծեր, տեղեկատվական տեխնոլոգիաներ. հեղափոխական երեք փոփոխություններ, որոնք աշխատանքային աշխարհն արդեն վերապրել է։ Հիմա մենք չորրորդի շեմին ենք։ «Արդյունաբերություն 4.0» տեսլականը «խելացի» գործարանի կոնցեպտ է։ Մեքենաները, մշակվող դետալներն ու տրանսպորտային միջոցները տվիչների, փոքրիկ համակարգիչների և հաղորդակների միջոցով միավորված են մեկ ցանցում և միացված են ինտերնետին։ Արդյունքում դրանք կարող են անընդհատ տեղեկատվությամբ փոխանակվել։ Արտադրությունն ու նյութատեխնիկական ապահովումը օպտիմալացվում են, իսկ արտադրանքները համապատասխանեցվում են ցանկություններին։ Այս նպատակին հասնելու համար իրենց ջանքերն են մեկտեղել մեքենաշինարարները, ՏՏ ոլորտի փորձագետները և լոգիստները։

Ֆիլմ «Ապագայի ֆաբրիկան. արդյունաբերություն 4.0»

Ապագայի ֆաբրիկայում ամեն ինչ ցանցի միջոցով փոխկապակցված է

3D տեխնոլոգիան ստեղծում է ֆիլմի բոլորովին նոր ընկալում։ Նախկինում հեռուստադիտողին պետք էր հատուկ ակնոցներ, քանի որ տարածության զգացողություն առաջանում է միայն այն դեպքում, երբ աջ և ձախ աչքերը ճանաչում են տարբեր հեռանկարներ։ Նոր հեռուստացույցները 3D պրոյեկցիա են ապահովում առանց ակնոցի, սակայն լուծաչափը շատ փոքր է լինում, քանի որ էկրանը միաժամանակ պետք է ցուցադրի մի քանի ցրված հեռանկարային դիտակերպ։

Բեռլինցի մի խումբ գիտնականներ աշխատում են պատկերների մշակման նոր մեթոդների վրա, որոնք լուծում են այդ խնդիրները։ Տվիչները գրանցում են դիտողների դիրքը, մինչդեռ ծրագրաշարը յուրաքանչյուր դիտողի համար ստեղծում է անթերի եռաչափ պատկեր, նույնիսկ եթե նրանք սենյակում տեղաշարժվում են։

3D՝ հեռուստադիտողն այնպիսի զգացողություն ունի, կարծես թե մասնակցում է էկրանին տեղի ունեցող գործողությանը