ფიზიკური ინფრასტრუქტურის აღნუსხვის გრანტი

ფიზიკური ინფრასტრუქტურის აღნუსხვა მოიცავს, კულტურის, შემოქმედებითი თუ სხვა დანიშნულების ინფრასტრუქტურის ფიზიკურ აღნუსხვას.  შედეგად, შეიქმნება მსგავსი სივრცეების ერთიანი რუკა/მონაცემთა ბაზა, რომელიც შემოქმედებითთან ერთად, გააერთიანებს ისეთ სივრცეებსაც, რომლებიც არ აშენებულა ან/და მანამდე არ გამოიყენებოდა შემოქმედებითი მიზნებისთვის (მაგ: მიტოვებული საწყობები, ყოფილი საწარმოო ტერიტორიები და მსგავსი).

ყველა ტიპის საკუთრებაში არსებული ფიზიკური ინფრასტრუქტურის აღნუსხვაა შესაძლებელი, არ აქვს მნიშვნელობა ამჟამად ვის საკუთრებაშია.

„შემოქმედებითი კომპასის“ პროექტს ჰყავს ცალკე ექსპერტთა ჯგუფი, რომელიც მუშაობს ფიზიკური აღნუსხვის მეთოდოლოგიაზე. კერძოდ, ექსპერტების პასუხისმგებლობაა ფიზიკური აღნუსხვის მეთოდოლოგიის შემუშავება, მუნიციპალიტეტების მერიების წარმომადგენელთა უნარ-ჩვევებისა და ცოდნის გაღრმავება (ონლაინ ტრენინგების მეშვეობით) ინფრასტრუქტურის ფიზიკურ აღნუსხვაში და მუნიციპალიტეტების მერიების წარმომადგენელთა ფიზიკური აღნუსხვის პროცესში კონსულტაციის გაწევა. 

შემოქმედებით ინდუსტრია მოიცავს შემდეგ მიმართულებებს: არქიტექტურა, სახვითი ხელოვნება, კინო და ვიდეო, დიზაინი და მოდის ინდუსტრია, მედია და მაუწყებლობა, სახელოვნებო და კულტურის განათლება, გასტრონომია და კულინარია, მუსიკა, რეკლამა, საშემსრულებლო ხელოვნება, რეწვა, კულტურული მემკვიდრეობა, ლიტერატურა და გამომცემლობა და ციფრული ტექნოლოგიები.
 

ფიზიკური აღნუსხვის საგრანტო კონკურსის ფარგლებში დაფინანსების მიღების შემდეგ, საგრანტო ხელშეკრულების ფარგლებში, მუნიციპალიტეტებს არ მოეთხოვებათ ფინანსური და შინაარსობრივი ანგარიშის წარდგენა. სავალდებულოა, შესაბამისი მეთოდოლოგიით ჩატარებული ფიზიკური აღნუსხვის კვლევითი დოკუმენტის წარმოდგენა გრანტით გათვალისწინებულ ვადებში.