မြို့ပြလမ်းညွှန်။ ။Freiburg
‌အမျိုးသမီးများအတွက်ရေကူးကန်လေးနှင့် စိမ်းလန်းသောမြို့လေး

ဖရိုင်းဘဂ်သည် ဂျာမနီ၌ စိမ်းလန်းသောမြို့တော်အဖြစ်ထင်ရှားသည်။ ဆောင်းပါးရှင် ဂီနာကွတ်ကတ် (Gina Kutkat) အနေနှင့် ဘရေ့ဂူး (Breisgau) ဒေသရှိထိုနွေးထွေးသောမြို့လေးသို့သွားရောက်၍ အဆိုပါလျှို့ဝှက်ချက်ကိုရှာဖွေထားပါသည်။ ထို့အတူ ပထမတစ်ခါကြည့်ရုံနှင့်သတိမပြုမိတတ်သည့်မြို့၏ကောက်ကြောင်းများကိုဖော်ထုတ်ရင်း တမူထူးခြားသောဟန်ပန်ရှိသည့်နေရာများနှင့်အမြင်ကျယ်သည့် မြို့ခံများကိုလည်း တွေ့မြင်နိုင်ပါသည်။ 

ရေးသားသူ​ Gina Kutkat

တို့ဟူးဆိုင်များရှိ သူတော်စင်နှင့်အပြစ်သားများ

"ခပ်မြင့်မြင့်ပဲတက်တက်၊ ခပ်မြန်မြန်ပဲလျှောက်လျှောက်" သက္ကရာဇ် ၁၂၀၀ နှင့် ၁၅၃၀ ကြားတွင်ဆောက်လုပ်ခဲ့သော ဖရိုင်းဘဂ်ဘုရားကျောင်းသည်မြို့၏အထင်ကရဖြစ်လေသည်။ အမြင့်တက်ဝါသနာပါသူများအနေနှင့် ၁၁၆ မီတာမြင့်၍ လှေကားထစ်ပေါင်း ၂၆၅ ထစ်ရှိသောဘုရားကျောင်းခေါင်မြင့်ပေါ်ရှိရှုမျှော်စင်ပေါ်မှနေ၍ မြို့၏အံ့သြမင်သက်ဖွယ်ရှုခင်းကိုခံစားနိုင်၏။ မြေပြင်ပေါ်၌နေရင်းပင် ဘုရားကျောင်းကြီး၏သမိုင်းကြောင်းကို လေ့လာလိုသူများအနေဖြင့် ဘုရားကျောင်းကြီး၏ကျက်သရေခန်းကြီးကိုကျေနပ်ဖွယ်တွေ့မြင်နိုင်ပါသည်။ မကောင်းမှုဒုစရိုက်နှင့်အပြစ်ဆိုးများကို ကြောက်လန့်၍ရှောင်ကြဉ်ရန်အလို့ငှာ သူတော်စင်များ၊ ကြောက်မက်ဖွယ်သတ္တဝါဆန်းကြီးများ၊ ဆန်းပြားသောအသွင်ရှိသည့်လူပုံစံများ၊ မိစ္ဆာနတ်ဆိုးတို့၏ရုပ်ပုံကြီးများကိုထုလုပ်ထားပြီး ထိုမရေတွက်နိုင်အောင်များသောရုပ်တုများက ဘုရားကျောင်းကြီး၏ကျက်သရေခန်းကြီးကို လှပသက်ဝင်နေစေ၏။ မြို့နှင့်မရင်းနှီးနေသောသူများအနေနှင့် ဘုရားကျောင်းခေါင်မြင့်ကို အသုံးဝင်သောလမ်းညွှန်အဖြစ်အသုံးပြုနိုင်၏။ ဘုရားကျောင်းကိုသာမက ဘေးကပ်လျက်ရှိနေ့စဉ်သက်ဝင်လှုပ်ရှားနေသောစျေးကိုလည်း မြို့ခံများသည်တန်ဖိုးထားကြ၏။ ‌‌ဒေသထွက်ကုန်များ၊ ရာသီပေါ်ကုန်များအပြင် ရောင်စုံစျေးဆိုင်လေးများနှင့်ကားလေးများဖြင့်လှည့်လည်ရောင်းချသောတို့ဟူးဆိုင်များတွင်လည်း အတွေ့အကြုံအသစ်များရှာဖွေနိုင်ပါသည်။ လျှို့ဝှက်မုန့်ဖုတ်နည်းအတိုင်းဖုတ်ထားသော စတီဖန်လန်ဒါ (Stefan Linder) ၏ ချိစ်ကိတ်ဆိုလျှင် သက်တမ်း ၁၇ နှစ်တိုင်ခဲ့လေပြီ။ စတီဖန်လန်ဒါ (Stefan Linder) သည်သူ၏ကိတ်မုန့်များကို မွန်စတာစျေး (Münster Market) တွင်စတင်ရောင်းချခဲ့ပြီး ယနေ့တိုင်ထိုနေရာ၌ ချိုစိမ့်သောကိတ်မုန့်၏အရသာကို မြည်းစမ်းနိုင်သေးသည်။ နယ်ခံများ၏အသည်းစွဲဖြစ်သည့် ဤကိတ်မုန့်သည် ဖရိုင်းဘဂ်မြို့အပြင်ဘက်ရှိစားသုံးသူများကိုပါဆွဲဆောင်နိုင်ပြီး အမျိုးမျိုးသောစျေးနေရာများနှင့်အသင့်စားအစားအသောက်များရောင်းချသည့်ဆိုင်များတွင်လည်း ဝယ်ယူရရှိနိုင်ပါသည်။
 

လက်ဝဲဘက်သို့ စောင်းငဲ့ကြည့်ခြင်း

မြင့်မားလှသောငှားရမ်းခများ၊ အသုံးမပြုတော့သည့်အဆောက်အဦးများ၊ နေအိမ်ရပ်ကွက်အဆင့်မြှင့်တင်မှုများကြောင့် ဖရိုင်းဘဂ်၏အိမ်ခြံမြေစျေးကွက်မှာ ကသောင်းကနင်းများဖြစ်ကုန်၏။ အိမ်ငှားထပ်မတင်ချင်တော့သဖြင့် မိမိတို့ကိုယ်တိုင်အသုံးပြုရန်အတွက် ထပ်၍မငှားနိုင်ဟုဆိုကာ လီဆယ်ပြောဆိုကြသည့် အိမ်ရှင်မြေရှင်များလည်းရှိကြ၏။ ခေါင်ခိုက်အောင်မြင့်သောအိမ်ငှားခများနှင့် ထိုကဲ့သို့အိမ်ငှားနှင်ချမှုများကို ဆန့်ကျင်သည့် တက်ကြွလှုပ်ရှားသူများလည်းရှိလေသည်။ ဤအချင်းအရာများသည် Grethergelände ခေါ် ဂရေသာကွန်ပေါင်းကိုပေါ်ပေါက်စေခဲ့သည့် ဖရိုင်းဘဂ်၏ကျုးကျော်အိမ်ရာသမိုင်းကို အမှတ်ရစေလေသည်။ ၁၉၈၀ ပြည့်လွန်ခုနစ်များတွင် တက်ကြွလှုပ်ရှားသူများအနေနှင့် ဂရေသာနှင့်စိုင် (Grether & Cie) ကုမ္ပဏီ၏စက်ရုံနေရာကိုဖျက်သိမ်းရန်အစီအစဉ်ကို အောင်မြင်စွာဟန့်တားနိုင်ခဲ့လေသည်။ ယနေ့ခေတ်တွင်မူ မင်ရှောဆာဆင်ဒိကတ် (Mietshäuser Syndikat -အိမ်ခြံမြေဆိုင်ရာအဖွဲ့အစည်း) အနေနှင့် မြို့လယ်ကောင်နှင့်နီးသောနေရာတစ်ခုတွင် သင့်တင့်သောနှုန်းထားဖြင့်အိမ်ငှားရမ်းနိုင်ရန် လူအယောက်၁၀၀ခန့်ကို ဝန်ဆောင်ပေးလျက်ရှိသည်။ ဂ‌ရေသာသည် လက်ဝဲယိမ်းပရောဂျက်များစွာတို့စု‌‌ဝေးရာ ကိုယ်ပိုင်အုပ်ချုပ်ခွင့်ရနေရာဖြစ်၏။ ရိုဆာဟိုက်ဖ် (Rosa Hilfe) အမျိုးသမီးရေးရာစင်တာ၊ ရေဒီယိုဒရက်လန်း (Radio Dreyeckland) နှင့် ဖရိုင်းဘဂ်ဖိုရမ် အာခီဗ့်ဂီဂျန်သြစ်ဂရန်း (Freiburg Forum aktiv gegen Ausgrenzung - ဖြစ်ပေါ်လျက်ရှိသောဖယ်ကျဉ်ခံထားရမှုများကိုဆန့်ကျင်သည့်ဖရိုင်းဘဂ်မြို့ အခြေစိုက်ဖိုရမ်) တို့သည်လည်းထိုနေရာ၌ ရုံးစိုက်လေသည်။ အများပြည်သူများအနေဖြင့် စထရန်းကဖေး (Strandcafé) ကဲ့သို့ စီပွားရေးနှင့်မသက်ဆိုင်သည့်လုပ်ငန်းများအတွက် တွေ့ဆုံဆွေးနွေးနိုင်ရန်ဖွင့်လှစ်ထားသောနေရာများအပြင် နွေရာသီတွင်လည်း အစဉ်အလာအရကျင်းပလေ့ရှိသောမြက်ခင်းပြင်ပွဲတော်များတွင် တွေ့ဆုံစည်း‌ဝေးနိုင်လေသည်။

လက်ထပ်ဖို့လား။ ခြေဆင်းရုံပဲလား။

"ဖရိုင်းဘဂ်ဘချ့်လေရေမြောင်းငယ်ထဲသို့ခြေဆင်းမိလျှင်ဖြင့် ဖရိုင်းဘဂ်‌မြို့ခံနဲ့ညားတတ်သည်။”  ဟူသောချစ်စဖွယ်ဆိုရိုးဟောင်းတစ်ခုရှိလေသည်။ ထိုဆိုရိုးမှန်မမှန်ကို အတိအကျစာရင်းပြုစုထားခြင်းမရှိသော်ငြား ထိုဆိုရိုးကဲ့သို့ အိမ်ထောင်ကျသွားသောလူအတော်များများလည်းရှိသည်မှာသေချာပေသည်။ ကိုးကီလိုမီတာခွဲမျှရှိသော ဘချ့်လေမြောင်းငယ်လေးသည် (ဘေဒင် (Baden) ၌ ချောင်းငယ်၊ မြောင်းငယ်များ၏အမည်နောက်တွင် "လေ"ဟုထည့်သွင်းခေါ်ဝေါ်အသုံးပြုကြ၏။) ဖရိုင်းဘဂ်၏လမ်းကျဉ်းလေးများနှင့် နောက်ဖေးလမ်းကြားလေးများကို ရစ်ခွေစီးဆင်းလျက်ရှိသည်မှာ အလယ်ခေတ်ထဲကဖြစ်၏။ တစ်ချိန်တုန်းက ထိုမြောင်းငယ်လေးကို မွေးမြူထားသောတိရစ္ဆာန်များကိုရေချရန်၊ မီးငြိမ်းသတ်ရန်အတွက်အသုံးပြုခဲ့ကြသော်လည်း ယနေ့ခေတ်တွင်မူ ထိုနေရာလေးသည် အလုပ်အဆင်းဘီယာလေးမော့ရင်း အေးမြသောရေထဲသို့ခြေထောက်လေးချကာအပန်းဖြေကြသူများနှင့် နွေရာသီတွင်အထူးစည်ကားလျက်ရှိ၏။ အရုပ်လှေငယ်ကလေးများကို ဘုရားကျောင်းအနီးရှိစျေးတွင် ဝယ်ယူနိုင်ပြီး မြို့ထဲသို့ရစ်ခွေစီးဆင်းနေသော မြောင်းငယ်လေးအတိုင်း ထိုလှေကလေးများအစုန်အဆန်မျောပါနေပုံမှာ ကလေးများကိုပျော်ရွှင်စေမည်မှာ အမှန်ပင်ဖြစ်သည်။ ၂၀၀၉ခုနှစ်မှစတင်၍ ဖရိုင်းဘဂ်ရှိ ပရဟိတအဖွဲ့တစ်ခုသည် ရောင်စုံရွက်များနှင့်ချစ်စဖွယ်ကောင်းသောသစ်သားလှေငယ်လေးများကို တည်ဆောက်လျက်ရှိ၏။ ဘချ့်လေသို့လာရောက်အပန်း‌ဖြေကြသူများတွင် ကျော်ကြားသောသူများကိုလည်းတွေ့နိုင်၏။ ၂၀၀၁ခုနှစ်ဇွန်လတွင် လာရောက်သော ဂျက်ချီရက် (Jacques Chirac) ၏အလည်အပတ်ခရီးစဉ်အတွင်း ဂျက်ချီရက် (Jacques Chirac) သည် ဂျာမန်ဝန်ကြီးဟောင်း ဂျရတ်ရှော်ဒါ (Gerhard Schröder) နှင့်အတူ ထိုနေရာတွင်ခြေထောက်စိမ်ခဲ့ဖူးသည်။ 

ညမအိပ်ချင်သူများနှင့်ယဉ်ကျေးမှုမြတ်နိုးသူများအတွက် 

ဖရိုင်းဘဂ်၏ညဘက်ပွဲလမ်းသဘင်များသည် သိပ်၍မထင်ပေါ်လှပေ။ ထို့အပြင် ကလပ်အများအပြားနှင့်ဘားဆိုင်များကိုလည်း မကြာသေးမှီနှစ်များအတွင်းကပင် အတင်းပိတ်သိမ်းခိုင်းခံခဲ့ရသေးသည်။‌ ဒေသခံများက "စတူလီ" (Stühli) ဟုချစ်စနိုးခေါ်ကြသော စတူလန်ဂါ (Stühlinger) ရပ်ကွက်တွင်မူ ပျော်ရွှင်ဖွယ်ညနေခင်းများကိုရှာတွေ့နိုင်သေးသည်။ ဖရိုင်းဘဂ်မြို့၏တစ်ခုတည်းသောညနက်အထိဖွင့်သည့်ဆိုင်လေးကို ထိုနေရာ၌ ၂၀၁၉ခုနှစ်နွေရာသီတွင်စတင်ဖွင့်လှစ်ခဲ့၏။ နေ့ဘက်ဖွင့်ကြသည့်စတိုးများမရှိသည့်ညအချိန်တွင် ဤဆိုင်လေး၌ လူငယ်လေးရှစ်ယောက်ကတစ်လှည့်စီတာဝန်ယူကာ လိုအပ်သည်များကိုရောင်းချ၍ဝန်ဆောင်မှုပေးလျက်ရှိသည်။ ထို့အပြင် ဂီတပွဲများနှင့်ပရဟိတပွဲအခမ်းအနားများအတွက် နေ့လည်စာဧည့်ခံပွဲများကိုလည်းတာဝန်ယူကျင်းပကြ၏။ စတူလီ (Stühli) အရပ်၌ အက်စ်ဟော့စ်ထရာဘီ (Eschholzstraße) ရှိ ဘိဘားဘွစ်လီမန်း (Beat Bar Butzelmann) နှင့် ဘာအမ်ဖန့်ခ်နက်ခ် (Bar am Funkeneck) တို့တွင်လည်း အေးစိမ့်သောဘီယာအရသာကိုခံစားနိုင်လေသည်။ ဟာစလာချာစထရာဘီ (Haslacher Straße) ရှိ အားတစ် (Artik) တွင် လူကြိုက်များသောရက်ပ်ဂီတအလွတ်တမ်းစပ်ဆိုပွဲ Rap Anker နှင့် စလိုးကလပ် (Slow Club) တွင်လည်း ပို့စ်ပန့်ခ်၊ အီလက်ထရို၊ ဆိုက်ကီးဒလစ် နှင့် ဒွန်းရော့ခ် စသည့်ဂီတအမျိုးအစားများကို ကြိုက်နှစ်သက်သူများအတွက် ပွဲများစီစဉ်ပေးလျက်ရှိကာ ထိုပွဲတို့သည်လည်း ပေးရသောငွေးကြေးနှင့်တန်သည်ချည်းသာဖြစ်လေသည်။ ဤသို့ အရေးပါသောပြည့်သူ့အခြေပြုလုပ်ငန်းများကိုဆောင်ရွက်နေခြင်းဖြစ်ရာ လိုအပ်သောယဉ်ကျေးမှုဖြည့်ဆည်းရာအဖွဲ့အစည်းဟူ၍ ထိုကလပ်သည်၎င်းကိုယ်တိုင်အမည်ပေးထားလေသည်။ ယဉ်ကျေးမှုအတွက်ထပ်ဆောင်းအကြံပြုချက်တစ်ခု။   ။ ခေတ်ပေါ်ပြဇာတ်ကို တင်ပြဖော်ကြူးထားရာနေရာဖြစ်သော သီရေတာဒါအင်မောရယ်လစ်ဆင် (Theater der Immoralisten - စာရိတ္တချို့ယွင်းသူများ၏ ပြဇာတ်ရုံ) သို့လည်းသွားရောက်ကြည့်ရှုသင့်ပေသည်။

မြို့လယ်၌ရှိသောရေကန်ကလေး

ဖရိုင်းဘဂ်မြို့ခံများ၏အသည်းနှလုံးကိုဆုပ်ကိုင်နိုင်ဆုံးကိုသိလိုလျှင် သူတို့အနှစ်သက်ဆုံးနေရာသို့ သွားရောက်ကြည့်သင့်သည်။ ထိုနေရာမှာ ဒရေဆင် (Dreisam) မြစ်တစ်လျှောက်ပင်ဖြစ်သည်။ ဒရေဆင် (Dreisam) မြစ်သည် မြို့ကိုဖြတ်သန်းစီးဆင်းလျက်ရှိပြီး အေးမြသောမြစ်ရေအတွင်း၌ အမျိုးမျိုးအပန်းဖြေနေကြသူများကို လည်းတွေ့နိုင်လေသည်။ နေရောင်ပြန်လည်ထွက်ပေါ်လာသော ဖေဖော်ဝါရီလအလယ်ခန့်ရောက်ပြီဆိုလျှင် ဤနေရာသို့ လူများတဖွဲဖွဲလာရောက်ကြပြီဖြစ်သည်။ အချို့ကအပြေးကျင့်၍ သို့မဟုတ် စက်ဘီးစီး၍ဖြစ်စေ၊ ပုခက်လေးများဆင်၍ထိုပုခက်အတွင်းမှေးစက်၍ဖြစ်စေ၊ အေးမြသောရေထဲတွင်ရေကူး၍ဖြစ်စေ စသည်ဖြင့်အမျိုးမျိုးအပန်းဖြေနိုင်၏။ ဂရေဖန်တံတား (Greifenegg Bridge) နှင့် ဒ‌ရေဆင်ဆွင်း (Dreisam Swing) တို့ကြားတွင် ငါးများဆန်တက်ကူးခတ်နိုင်ရန်အထူးတည်ဆောက်ထားသည့်နေရာလေးသည် ရေကူးရန်သင့်တော်သော နေရာတစ်ခုဖြစ်လေသည်။ ထုထည်ကြီးမားသောထိုလျောစောက်သည် ငါးများဒရိုင်းဆမ်မြစ်ဘက်သို့ပြန်လည်ကူးခတ်ရန်အကူအညီအဖြစ်ဒီဇိုင်းဆောက်လုပ်ထားသော်လည်း ရေကူးအပန်းဖြေရန်အတွက်အလွန်သင့်လျော်သလို မြို့လယ်ကောင်ရှိ လူကြိုက်များသည့်ရေကူးကန်တစ်ခုလည်းဖြစ်သည်။ ဆန်ဖန်ဝက် (Sandfangweg) နှင့် လူငယ်တည်းခိုဆောင်ကြား အရှေ့စူးစူးအရပ်ရှိဒရေဆန်မြစ်အပိုင်းသည် ရေစပ်စပ်လေးထဲတွင်အပန်းဖြေအနားယူရန်အတွက်အကောင်းဆုံးဖြစ်သည်။ သို့မဟုတ်ကလည်း ဆန်ဖန်ဝက်စီ (Sandfangwiese - ရေစပ်စပ်ရှိသောမြက်ခင်းပြင်) နှင့် မိုင်ပေါင်းများစွာရှည်လျားသောဒရေဆန်မြစ်ကမ်းတစ်လျှောက်တွင်လည်း အပန်းဖြေနိုင်လေသည်။

ကားမဝင်ရ။

ဖရိုင်းဘဂ်သည် ၎င်း၏စိမ်းလန်းသာယာလှပမှုအတွက် လူသိများ၏။ သဘာဝပတ်ဝန်းကျင်ထိန်းသိမ်းရေးကိုအဓိကဆောင်ရွက်သည့်မြို့တော်ဝန်ရှိသော၊ လမ်းများထက်တွင်စက်ဘီးသမားများကြီးစိုးသောဂျာမနီနိုင်ငံ၏ပထမဆုံးမြို့ဖြစ်လေသည်။ ဂျာမနီနိုင်ငံတွင်ပထမဆုံးဖြစ်သည့်အပူပေးစနစ်အတွက်ကုန်ကျငွေကိုသိသိသာသာလျော့ချပေးနိုင်စေရန် အပူကာစနစ်ကိုအဆောက်အဦးတွင်းထည့်သွင်းတည်ဆောက်ထားပြီး စွမ်းအင်ချွေတာသည့်အထပ်မြင့်အဆောက်အဦးကြီး ဝိန်ဂါတန်ဝက်စ် (Weingarten-West) တည်ရှိရာမြို့လည်းဖြစ်၏။ မြို့တွင်း၌ကားမသွားရဟူ၍ ကန့်သတ်ထားသောနေရာတစ်ခုပင်ရှိလေသည်။ တစ်ချိန်ကပြင်သစ်စစ်တပ်အခြေစိုက်စခန်းနေရာတွင်တည်ဆောက်ထားသော ဗောဘန် (Vauban) ရပ်ကွက်ရှိ ပြပွဲရှိရာဆီသို့ ဓာတ်ရထားလေးတက်စီး၍လာရောက်နိုင်၏။ ၁၉၉၃ ခုနစ်တွင် ကျောင်းသားများနှင့်ကျူးကျော်နေထိုင်သူများသည် သဘာဝပတ်ဝန်းကျင်ကိုအလေးထားပြီးဖော်ရွေခင်မင်ဖွယ်ကောင်းသောအဝန်းအဝိုင်းလေးကို ဤနေရာလေးတွင်ဖန်တီးခဲ့ကြ၏။ ယနေ့ခေတ်တွင်မူ ထိုအရပ်ရှိ‌မြို့ခံများသည် ရေကိုအပူပေးရန်အတွက်ကမ္ဘာမြေအတွင်းပိုင်းမှရရှိသောအပူစွမ်းအင်ကိုသာအသုံးပြုကြပြီး  အော်ဂဲနစ်အညစ်အကြေးများကိုလည်း ဇီဝဓာတ်ငွေ့ထုတ်လုပ်သောစက်ရုံများသို့ စွန့်ပစ်ကြ၏။ ဗောဘန်ရပ်ကွက်အတွင်းလှည့်လည်ကြည့်ရှုမည်ဆိုလျှင် ကားများကိုတွေ့ရမည်မဟုတ်ဘဲ ကြက်လှောင်အိမ်လေးများ စွန့်ပစ်အော်ဂဲနစ်ပစ္စည်းများမှဇီဝစွမ်းအင်ပြန်လည်ထုတ်လုပ်ပေးသောစက်များကိုသာတွေ့ရမည်ဖြစ်ပြီး ရပ်ကွက်အစွန်ရှိကားပါကင်လေးခုတွင်သာ ကားများကိုတွေ့နိုင်မည်ဖြစ်သည်။ 

အမျိုးသမီးများနှင့်ရေကူးခြင်း

ဖရိုင်းဘဂ်မြို့၏တစ်ချိန်ကစံသတ်မှတ်ချက်တစ်ခုသည် ယခုအခါထူးခြားမှုတစ်ခုဖြစ်လို့လာခဲ့လေသည်။ ထိုအရာမှာ မိန်းကလေးများအတွက်သီးသန့် ရေကူးကန်ပင်ဖြစ်လေသည်။ လော်လို (Lollo) ဟုအတိုကောက်ခေါ်ကြသည့် လော်တိုဘတ် (Lorettobad) ရေကူးကန်ကို ၁၈၄၁ ခုနှစ်မှစတင်ဖွင့်လှစ်ခဲ့၏။ ကနဦးတွင်အမျိုးသားများအတွက်သာရှိခဲ့သော်လည်း ၁၈၈၆ ခုနှစ်အရောက်တွင် အမျိုးသမီးသီးသန့်ရေကူးကန်ကိုပါ တိုးချဲ့ဖွင့်လှစ်ခဲ့သည်။ ထိုကဲ့သို့ ရေကူးကန်ကို အမျိုးသား၊ အမျိုးသမီးသီးခြားကန့်သတ်ထားခြင်းသည် ဂျာမန်အင်ပါယာခေတ်တွင်မူ ဖြစ်ရိုးဖြစ်စဉ်သာဖြစ်လေသည်။ လော်လို (Lollo) ရေကူးကန်ကိုထူးခြားစေသောအချက်မှာ ယနေ့အချိန်ထိ အမျိုးသမီးနှင့်ကလေးများအတွက် သီးခြားရေးကူးကန်ကိုထားရှိပေးထားခြင်းဖြစ်လေသည်။ အများစုမှာ ပထမတစ်ခေါက်လည်ပတ်စဉ်ကတည်းက လွမ်းမောဖွယ်အတိတ်ကိုခံစားရသဖြင့် မကြာခဏဆိုသလို ပြန်လည်လာရောက်တတ်ကြ၏။ အမျိုးသားများအနေနှင့်လည်း မိသားစုရေကူးကန်များတွင်အပန်းဖြေရေကူးနိုင်မည်ဖြစ်ပြီး လှပ၍ချစ်စဖွယ်ကောင်းသောအဝတ်လဲခန်းများကိုငှားရမ်းနိုင်ရန် တန်းစီနေကြသောလူတန်းရှည်ကြီးကိုလည်းတွေ့မြင်နိုင်မည်ဖြစ်သည်။ ဖရန်ဒီဒက်စ်လောရီတိုဘတ်စ် (Freunde des Lorettobads e.V.) ၏ ရေကူးအဖွဲ့မှစီစဉ်ကျင်းပသော ဂန္တဝင်ဂီတဖျော်ဖြေပွဲများမှာလည်း ထင်ရှားလေသည်။

အားလုံးအတွက် မြို့ခံတောင်လေးတစ်လုံး

ဖရိုင်းဘဂ်မြို့ရှိ ရှောင်းအင်စ်လန်း ဟုခေါ်သောတောင်၏အမည်မှာ "ကျေးလက်ဒေသများကိုရှုမျှော်ကြည့်ခြင်း" ဟုအဓိပ္ပာယ်ရပြီး ထိုတောင်မှာလည်း ၎င်း၏အမည်အတိုင်းကျော်ကြားလေသည်။ ပင်လယ်ရေမျက်နှာပြင်အထက် ၁၂၈၄ မီတာအမြင့်မှနေ၍ ရင်သပ်ရှုမောဖွယ်ရာမြို့၏ရှုခင်းအလှကိုခံစားနိုင်၏။ မြို့လယ်ကောင်မှလာလျှင် မိနစ်လေးဆယ်မျှသာရှိသော မြို့ထဲမှထိုနေရာသို့လာရာခရီးတစ်လျှောက်သည် ချစ်စဖွယ်ကောင်းနေ၏။ မြို့ထဲမှနေ၍ ဓာတ်ရထားစီး၊ ထို့နောက်ဘတ်စ်ကားထပ်စီးလျှင် ရှောင်းအင်စ်လန်းတောင်ပေါ်ကေဘယ်ကားဂိတ်သို့သွားရာ လမ်းခရီးတွင်တစ်ထောက်ရပ်နားနိုင်သော သေးငယ်သော ဂွန်တာကော်ဖီရိုစတာ (Günters Coffee Roasters) ကုမ္ပဏီငယ်လေးတည်ရှိရာ ဂွန်တာဆယ်လ် (Günterstal) သို့ရောက်၏။ ထို့နောက် မိနစ် ၂၀ ခန့် ကောင်းကင်ကြိုးရထားစီး၍ တောင်ထိပ်သို့သွားရောက်နိုင်သည်။ ထိုတောင်ကြီးသည် ဖရိုင်းဘဂ်မြို့ခံတို့မျိုးရိုးစဉ်ဆက်အလိုက်လာရောက်၍ နှင်းလျောစကိတ်စတင်အစီးသင်သည့်နေရာလည်းဖြစ်သည်။ ဧည့်သည်များအနေနှင့် အပန်းဖြေလမ်းလျောက်ခြင်း၊ စက်ဘီးစီးခြင်း၊ စွတ်ဖားလှည်းစီးခြင်း၊ နှင်းများကြားထဲတွင်ခရီးကြမ်းလမ်းလျှောက်ခြင်းတို့အတွက်လာရောက်နိုင်သလို တစ်ခုခုစားသောက်ရန်အတွက်လည်းလာရောက်နိုင်၏။ ဘုရားကျောင်းဘေးရှိ စျေးတန်းကလေးသည် ဘုရားကျောင်းအတွက်အ‌ရေးပါသကဲ့သို့ ရှောင်းအင်စ်လန်း တောင်ကြီးသည်လည်း ဖရိုင်းဘဂ်မြို့အတွက် မရှိမဖြစ်အရေးပါလှပေသည်။

ကျွန်တော်နှင့် ကျွန်တော်၏ဘီးကလေး

ကျွန်တော်နှင့် ကျွန်တော်၏ ဘီးကလေး
 
ဖရိုင်းဘဂ်သည် စက်ဘီးသမားတို့၏အထွတ်အမြတ်ထားရာဘာသာရေးမြို့တော်ဖြစ်လေသည်။ "ရာသီဥတုကဆိုးရွားခြင်းမဟုတ်။ အဝတ်အစားကသာ ရာသီဥတုနှင့်မသင့်လျော်ခြင်းဖြစ်၏။" ဆိုသောဆောင်ပုဒ်နှင့်အညီ ဤမြို့၌စက်ဘီးများကိုဆယ့်နှစ်ရာသီပတ်လုံးလမ်းပေါ်တွင်တွေ့ရမည်ဖြစ်ပြီး လမ်းသွယ်လေးများကိုလည်း ၎င်းတို့ကသာစိုးမိုးထားလေသည်။ ကံကောင်းထောက်မစွာဖြင့် နေရောင်ခြည်ကိုအချိန်အတော်များများရရှိရာအရပ်ဖြစ်သော ဖရိုင်းဘဂ်သည် ဂျာမနီ၏ တူစကန်နီ (Tuscany) ဟုပင်ခေါ်ဆိုနိုင်သည်။ စက်ဘီးသည် ဤမြို့၏လူကြိုက်အများဆုံးယာဉ်ဖြစ်ကြောင်းကို ကီလိုမီတာ ၄၀၀ ကျော်မျှရှိသောစက်ဘီးလမ်းများကို ကြည့်လျှင်သိနိုင်၏။ လမ်းများပေါ်၌သွားလာနေသမျှစုစုပေါင်းအရေအတွက်၏သုံးပုံတစ်ပုံကျော်ကျော်သည် စက်ဘီးများဖြစ်သည်။ ဘလူးဘရစ်ချ့် (Blue Bridge) ရှိ စက်ဘီးကောင်တာသို့ တစ်နေ့လျှင် စက်ဘီးစီးသူတစ်သောင်းလေးထောင်ခန့် ဖြတ်သန်းသွားလာလျက်ရှိပြီး အနာဂတ်တွင်လည်းထိုထက်ပိုများလာဖွယ်သာရှိ၏။ ဤသည်မှာ ဖရန့်ဖတ်မြို့ စက်ဘီးအန္တရာယ်ကင်းရှင်းရေးအဖွဲ့ကြီး၏ရည်မှန်းချက်ဖြစ်ပြီး အဖွဲ့ကြီးအနေနှင့် စက်ဘီးစီးသူအချိုးအစားပို၍တိုးတက်လာစေရေးနှင့် စက်ဘီးမတော်တဆမှုများလျော့ချနိုင်‌ရေးအတွက် အထူးရည်ရွယ်ထားလေသည်။ ဖရိုင်းဘဂ်၌ ကော်ဖီကိုပင် စက်ဘီးနှင့်လှည်လည်ရောင်းချတတ်ကြသေး၏။ ရာသီဥတုသာယာသောနေ့များတွင် ဂျူးဘုရားကျောင်းဟောင်းရင်ပြင်သို့ ဗောဘန်း (Vauban) ရပ်ကွက်မှလာရောက်ရောင်းချသောစက်ဘီးနှင့်ကော်ဖီဆိုင်ကို တွေ့နိုင်လေသည်။

မြတ်နိုးဖွယ်ရာကြယ်တာရာ

အယ်လ်ဘ်လူးဝစ် (Albert Ludwigs) တက္ကသိုလ်ရှိ နှစ်သောင်းခွဲခန့်သောကျောင်းသားတို့သည် ဖရိုင်းဘဂ်မြို့၏အလှအပတစ်ရပ်ကို ဖော်ကြူးလျက်ရှိကြသည်။ ကျောင်းသားတို့အနေဖြင့် ၂၀၁၅ ခုနှစ်မှစ၍ ဘာဆယ်မြို့သား ဗိသုကာပညာရှင် ဟန်းနရစ်ဒီဂိုလို (Heinrich Degelo) ၏လက်ရာဖြစ်သော ဒတ်စတား (Death Star) ဟု ကျော်ကြားသည့်အလွန်ခေတ်မီလှသောဒီဇိုင်းပုံစံရှိသည့် တက္ကသိုလ်စာကြည့်တိုက်ကြီးတွင် ပညာရပ်များကိုစတင်လေ့လာနေကြပြီဖြစ်သည်။ အချို့က ဤစာကြည့်တိုက်ကြီးကိုချစ်ကြသလို အချို့ကလည်းလှောင်ရယ်ကြ၏။ အကြောင်းမှာ စာကြည့်တိုက်ကြီးသည် စတင်ဖွင့်လှစ်သည့် အချိန်မှစ၍ ပြဿနာတစ်ခုပြီးတစ်ခုကြုံနေ၍ဖြစ်လေသည်။ ကနဦးတွင် ယူရို ၅၃ သန်းကုန်ကျခံဆောက်လုပ်ခဲ့သော်လည်း  ရေမလုံသောအဆောက်အဦးအပြင်ဘက်အလှကပ်ကိုပြင်ဆင်ရခြင်း၊ ခရုန်းစတီးနံရံများနှင့်မှန်ချပ်များမှနေရောင်အလင်းပြန်မှုကြောင့် အနီးနားရှိလမ်းပေါ်မှကားမောင်းသမားများ အနှောင့်အယှက်မဖြစ်စေရန် အမည်းရောင်အလင်းပြန်အကာများထပ်အုပ်ရခြင်း၊ လိုအပ်သောနေရာအကျယ်မရှိခြင်း စသည်ဖြင့်ထပ်တိုးပြင်ဆင်စရိတ်များမှာ တိုးတက်လျက်သာရှိ၏။ ဩဂုတ်၂၀၁၈ ခုနှစ်၊ ဩဂုတ်လတွင် အဆောက်အဦးအပြင်ဘက်အလှကပ်များပြုတ်ကျခဲ့သော်လည်း ကံကောင်းထောက်မသဖြင့် ထိခိုက်မှုတစ်စုံတစ်ရာမရှိခဲ့ပေ။ အထက်ပါအချင်းအရာများရှိနေသော်လည်း စာကြည့်တိုက်ကြီးသည် အမြင်အာရုံကိုဖမ်းစားနိုင်သောဗိသုကာလက်ရာတစ်ခု၊ ကျောင်းသားထောင်ပေါင်းများစွာတို့ စာပေဆည်းပူးလေ့လာရန်လာရောက်ကြသောနေရာတစ်ခုအဖြစ် ရပ်တည်လျက်ရှိလေသည်။